بعد إساءته للراحل سعيد صالح.. المهن التمثيلية تحيل الفنان فكري صادق للتحقيق

قررت نقابة المهن التمثيلية إحالة الفنان فكري صادق إلى جلسة تحقيق عاجلة برئاسة الفنان أشرف زكي، للوقوف على حقيقة التصريحات الصحفية التي نسبت إليه وتنال من الفنان الراحل سعيد صالح.

تحيا مصر يرصد إحالة فكري صادق للتحقيق. 

اعتذار نجل فكري صادق عن تصريحات والده

وكتب مراد نجل فكري صادق عبر صفحته الشخصية بموقع التواصل الاجتماعي فيس بوك: أختى الغالية و الفنانة بنت الأصول هند سعيد صالح  طبعا انتى تعلمى جيدآ عشقى و احترامى و تقديرى للنجم الكبير سعيد صالح و تاريخه منذ صغرى حنى تخرجنا انا وانتى من سنين زملاء  من المعهد العالى للسينما.

وتابع:  احنا اكبر من اننا نتكلم على صفحات الفيس بوك  يا بنت عمى و عمنا كلنا، ووالدى بنفسه قال فى كذا لقاء قبل كدة  أن علاقته بالفنان سعيد صالح وعادل امام كانت علاقة صداقة بعيد عن الفن و اشتغلوا سوا كتير و كل واحد مننا ممكن يقول كلمة عفوية  دون قصد غلط .... و خصوصآ لما تتطلع الكلمة من جيل والدك و والدى لأن دة جيل عظيم و فاهم و واعى و خصوصآ انهم جيل واحد كمان  و الجيل دا معروف بالحب أصلا لحد دلوقتى كمان.

أزمة فكرى صادق وسعيد صالح

وأضاف: و ان كانت كلمة طلعت غلط أو سوء تفاهم حصل بشكل مفاجئ مش معناه انه غلط لا سمح الله فى الاستاذ سعيد أو بيقل من شأنه رحمة الله عليه  و راعوا  يا جماعة كبر السن و العفوية فى الكلام للناس الكبار ... الناس دى  فنانين كبار و اكبر من اننا نلوم عليهم او نحاسبه بالكلمة ... لأن سعيد صالح دة نجم كبير و فكرى صادق فنان كبير برضو .. و شكرآ المهتمين و عارفين ان دة مش طبع والدى و ان عمره فى الوسط الفنى ما حد زعل منه.

وتابع: الحمد لله احنا ناس فى حالنا مش بتوع مشاكل ولا تريند علشان الناس تعرف مين فكرى صادق أو نقيس بالتريند شعبية نجم كبير زى الاستاذ سعيد صالح ؟؟؟ و ربنا يرحم الجميع  كل من عليها فان يا جماعة و كلمة ( فنان عادى)  كلمة لا تقليل شأن ولا سب و قذف لأي حد ..

واستطرد: وانا بيربطنى صداقة و زمالة مع اختى المونتيرة المبدعة (هند سعيد صالح) من خلال المعهد العالى للسينما و انا من عشاق النجم سعيد صالح و اشتغلت معاه مسلسل و كان انسان جميل و دمه زى العسسسل و قعدنا اتكلمنا كتير عن ذكرياته هو و ابويا سوا كتير ...  و رغم ظروفه المرضية الا انه كان قيمة كبيرة جدا فى المكان و الناس الكبيرة بيبقى معاهم عذرهم احيان كتير .. طالما لا يوجد اهانة او سب لا سمح الله .. يبقا الموضوع سؤ تفاهم و لازم توضيحه بشكل صحيح للناس فى اقرب وقت.

واختتم حديثه قائلًا: لكل عشاق النجم سعيد صالح  و انا اولهم طبعآ بس احتراما منكم و رجاء و ليس أمرا من حضراتكم ... بلاش نكبر المواضيع و نشمت فى بعض بالسرعة دى و نعلق لبعض المشانق  علشان  ممكن الحكاية تتفخم و يبقا موقف و يزعل ناس و اخوات و أصدقاء  من بعض عشرتهم و صداقتهم قد عمر جيل كامل زى جيلنا الحالى ... و ستستمر العلاقة الطيبة  بين الأبناء لأخر العمر بأذن الله و لن تتغير او تفسد   بسبب كلمة او وجهة نظر اتقالت على الهوا  بشكل عفوي.. دون مونتاج او تجميل للكلام من فنان له تاريخه و أعماله و عمره يتجاوز السبعين الحمد لله و هو والدى الفنان فكرى صادق والله يا جماعة إللى حصل دة بيحصل فى معظم البرامج المسجلة و بيحصل اكتر من كدة كمان و كلنا عارفين و فاهمين لكن برنامج الاستاذة لميس الحديدى .. برنامج على الهواء مباشرة لو كانت حلقة متسجلة ماكانش حصل كل دة  ... الحمد لله و كامل اعتذارى بشكل اخوى لأختى الغالية هند سعيد صالح و للنجم الراحل سعيد صالح .