الحب مالوش سن ودخلت معهد التمثيل من ورا أبويا.. أبرز تصريحات سوسن بدر في "واحد من الناس"

حلت الفنانة سوسن بدر مساء أمس ضيفة في برنامج "واحد من الناس"، الذي يقدمه الإعلامي عمرو الليثي ويذاع على شاشة تلفزيون قناة "الحياة"، وأثناء الحلقة تحدثت سوسن عن الكثير من الأمور التي تخص حياتها الشخصية والفنية، وفي هذا التقرير يرصد موقع تحيا مصر أبرز تصريحاتها في الحلقة.

أبرز تصريحات الفنانة سوسن بدر

ـ لو جالي واحد عايز يتجوزني دلوقتي هقوله لا.. وهشكره على العرض

ـ أنا النهاردة بقى عندي متطلبات وطموحات تانية بعملها في سني دا.. وبالتأكيد الحب مالوش سن

ـ في حاجات مش هتنازل عنها زي الإهانة والخيانة، وأنا عيشتهم الاتنين ومفيش حد معاشهمش.. دي شاكيرا اتخانت !

ـ أنا اتحبيت كتير من برا وجوا الوسط الفني، لأن أنا بحب بجد، ولما ببقى زعلانة من حد بقوله أنا زعلانة منك وبديله فرصة يقولي ليه

ـ بحب لقب أم ياسمين جدًا، وأكتر حاجة كنت حريصة عليها وأنا بربي ياسمين كذا حاجة زي كره الكذب

ـ في مهرجان من المهرجانات كنت واخدة جايزة وجم معايا ياسمين وعلي ابن أخويا، فقومت رقصت مع علي، فطلع عليا أني برقص مع شاب صغير، وسموني أم علي

ـ وفيه قدر وفيه مكتوب وفيه نصيب.. وفيه حاجات لازم نسأل فيها وحاجات لازم نرضى بيها

ـ في بداياتي كنت بشتغل مانيكان في 3 ثانوي وكانت الأستاذة رجاء الجداوي هي اللي كانت بتدربنا

ـ مدام رجاء مش بس علمتنا ازاي نمشي في العرض وازاي نتحرك ونلف، دي علمتنا ازاي نتكلم وازاي نقعد

ـ فضلت شغالة موديل سنة وشوية لغاية ما دخلت المعهد فركزت في التمثيل

ـ كنت في كلية علوم ومكنتش عايزة أطاع حاجة ولا ليا دعوة بكلية العلوم ولا كنت عايزة ادخلها

ـ أبويا كان رافض أني أدخل المعهد عشان كان شايف انها مهنة صعبة على بنت أو مش عايز بنته تبقى في المهنة الصعبة دي وكان عايز يفضلها مهنة عادية

ـ روحت الكلية مقدرتش وقعدت هناك 48 ساعة فقط، يعني دخلت قولتلهم يا جماعة فين المبنى قالولي هناك لقيته مشوار فروحت راجعة وقدمت في المعهد من ورا أبويا

ـ لما بابا عرف أني سيبت كلية علوم عشان ادخل المعهد زعل أوي بس مضربنيش

ـ عقابه هو أنه يخاصمني وهو عارف أن العقاب دا بالنسبالي مؤلم جدا لاني كنت بحبه حب مش طبيعي