سوسن بدر تكشف سبب تسميتها بـ نفرتيتي.. وتفاصيل دخولها معهد التمثيل دون علم والدها

كشفت الفنانة سوسن بدر السبب وراء تسمية الجمهور والوسط الفني لها بـ نفرتيتي، حيث أوضحت أن ذلك اللقب يعود إلى وقت تحضيرها إلى شخصية نفرتيتي في مشروع “إخناتون” مع المخرج شادي عبد السلام.

تحيا مصر يرصد السبب وراء تسمية سوسن بدر بـ نفرتيتي

سبب تسمية سوسن بدر بـ نفرتيتي

وقالت سوسن بدر في حلقتها ببرنامج “واحد من الناس” مع الإعلامي عمرو الليثي من خلال شاشة تلفزيون قناة “الحياة”: “أطلقوا عليا نفرتيتي مصر مش علشان المكان ولكن علشان كان الأستاذ شادي عبد السلام مختارني أعمل معاه نفرتيتي أيام ما كان بيعمل مشروعه أخناتون وكنت صغيرة جدا لسة واخدة ثانوية عامة لما شافني بالصدفة واختارني.. وسبحان الله هو توفى والفيلم متعملش وفضلت أنا واخدة توكيل الفراعنة لغاية النهاردة حتى باللوك الجديدة اللي أنا عملاه”.

وتابعت سوسن بدر قائلة: “وكان أستاذ شادي بيحضر هو وأستاذ صلاح مرعي إكسسوارات بتاعت شخصيات الفيلم فكان من ضمنها أنهم ياخدوا مقاس الراس عشان يعملوا التاج ومقاس الرقبة.. فكان دايما يقولي مقاساتك نفس مقاسات التمثال.. أنتي تمثال بس فيه الروح يعني لو خدنا منك الروح هترجعي تمثال تاني”.

دخول سوسن بدر معهد التمثيل دون علم والدها

ومن ناحية أخرى أكدت سوسن بدر على أنها تركت كلية العلوم والتحقت بمعهد التمثيل دون علم والدها، حيث قالت لـ برنامج “واحد من الناس”: “كنت في كلية علوم ومكنتش عايزة أطاع حاجة ولا ليا دعوة بكلية العلوم ولا كنت عايزة ادخلها.. وأبويا كان رافض أني أدخل المعهد عشان كان شايف أنها مهنة صعبة على بنت أو مش عايز بنته تبقى في المهنة الصعبة دي وكان عايز يفضلها مهنة عادية”.

وأضافت سوسن بدر: “وكان دايما يقولي خلصي الكلية وبعدين خشي المعهد براحتك، وروحت الكلية مقدرتش وقعدت هناك 48 ساعة فقط، يعني دخلت قولتلهم يا جماعة فين المبنى قالولي هناك لقيته مشوار فروحت راجعة وقدمت في المعهد من ورا أبويا”.

وعن رد فعل والدها تجاه ذلك الموقف قالت: “لما بابا عرف أني سيبت كلية علوم عشان ادخل المعهد زعل أوي بس مضربنيش، وهو عمره ما ضربني في حياتي ولا في حياته بس عقابه هو أنه يخاصمني وهو عارف أن العقاب دا بالنسبالي مؤلم جدا لأني كنت بحبه حب مش طبيعي”.