إلهام شاهين عن تبرعها بأعضائها بعد الوفاة: خير كبير وصدقة جارية على روحي ونفسي الدولة تفعل القانون

كشفت الفنانة إلهام شاهين عن سبب تحمسها لمبادرة التبرع بأعضائها بعد الوفاة مطالبة بتفعيل القانون.

تحيا مصر يرصد سبب تبرع الهام شاهين بأعضائها بعد الوفاة. 

إلهام شاهين مع محمد الباز

وقالت إلهام شاهين خلال مداخلة هاتفية مع الدكتور محمد الباز في برنامج آخر النهار المذاع عبر فضائية النهار: تحمست جدا لمبادرة الدكتور خالد منتصر للتبرع بالأعضاء لأي شخص محتاجها، نفسي يفعل القانون.

وتابعت: القانون موجود من مدة، لكن لم يتم تفعيله، لأنه محتاج ثقافة ووعي، سمعت إن التبرع بالأعضاء موجود في السعودية، سمعت آراء الدين سعد الدين الهلالي، والشيخ خالد الجندي، قالوا إنه خير كبير وصدقة جارية على روحي.

واختتمت حديثها قائلة: لو مت دلوقتي وأنا سايبة وصية بالتبرع، هيعملوا إيه،  الأعضاء هتروح فين؟.. لما بموت الروح بتروح لخالقها أما الجسد يفنى ويأكله الدود، ملوش لازمة، ممكن أخدم عدة أشخاص.

إلهام شاهين تتبرع بأعضائها السليمة

ونشرت إلهام شاهين فيديو، قالت فيه:" أعلن تبرعي بكل أعضاء جسدي السليمة بعد وفاتي لمن يحتاج لها، لأي إنسان محتاج قلب، كلى، كبد، قرنية أو رئة ممكن لما تتبرع  تفيد ناس كتير مش شخص واحد، لأن الجسد هيفنى وينتهي وياكله الدود ويبقى في التراب لكن بالتبرع بنعمل خير وبنبقى أكتر إنسانية وبنخفف الألم على الآخرين".

وتابعت:"أكيد مفيش حد بيطول عمر حد، والعمر له وقته ومكتوب، لكن على الأقل بنخفف عن غيرنا الألم وبنحميهم من الحياة التعيسة والأدوية الكتير، وأتمنى ننشر هذه الثقافة والوعي الإنساني المهم.

وأكملت حديثها: سألت شيوخ كتير مستنيرين وقالوا لي حلال جدا ، وإنهم معلنين ومتبرعين بأعضاء جسدهم السليمة بعد وفاتهم  ويا ريت كل إنسان مستنير وبيحب الإنسانية والخير يعمل كده، ويا ريت الدولة تعمل خانة في الرقم القومي يكون مكتوب فيها أنا متبرع موافق، علشان لما يموت حتى لو أهله ما عملوش ده الدولة تستفيد وتاخد الجثمان، ولازم يكون عندنا بنك لزراعة الأعضاء لمن يريد، يا رب نقدر كلنا نعمل خير وننشر الحب والمعاني الإنسانية الجميلة.