بزعل لما الناس تفتكرني بحب البنات ومش هتجوز تاني ومبحبش التمثيل.. أبرز تصريحات أحمد برادة

فجر لاعب الاسكواش والفنان أحمد براده عدد من التصريحات القوية خلال حلوله ضيف على برنامج كلام الناس المذاع عبر فضائية Mbc مصر من تقديم ياسمين عز.

ويرصدها تحيا مصر خلال السطور التالية:

تصريحات قوية للفنان أحمد براده

عايش لوحدي أنا وبناتي وأمي وربنا كرمني ببنتين هما أعظم بنتين بالنسبة لي وحياتي كلها ليهم

مبسوط وأنا معاهم وبكون مضايق لما يروحوا النادي وهما الحمد لله متربيين كويس

سبب رفض أحمد براده الزواج مرة ثانية

مش هتجوز تاني ربنا عمل لي كل حاجة ومش عاوز أكتر من كده

مش عارف يعني إيه حب وما بقتش عاوزه ومش بفهمه خلاص

موضوع الحب قفلته من5 سنين وخلصت المواضيع ما عنديش حد تاني في حياتي  ما عنديش وقت

ربنا بياخد من حتة ويدي من حتة تانية كتير جدًا فوق ما تتصوري وحبي بقى للشغل والنجاح ونفسي ربنا يقف جمبي أني أعمل حاجة كويسة لبلدي

لو جالي عرض بـ 100 مليون جنيه زي رمضان صبحي هسيب الأهلي

حبي للأهلي هيفضل وطول عمري بحب الأهلي بس لو كانوا وصلوا لـ رمضان صبحي جزء صغير في الفرق ما بين العقد ده والعقد ده كان هيكمل في الأهلي

الإعلام الرياضي لازم يتحسن بيدوشوا الناس بحاجات ملهاش لازمة

أنا بحب السرعة والإنجاز لكن إني أعيد مشهدا صعبا بالنسبة لي علشان كده مالقتش نفسي في التمثيل

ليلى علوي هي اللي رشحتني لحب البنان والفيلم كان مقبولا ولذيذا وتجربة ربنا وفقني فيها

مش عارف ليه الناس حبت أغنية نسيني وأنا جنبك، وبزعل أن الناس بتفتكرني بحب البنات مش بالاسكواش

موضوع محاولة اغتيالي مش كده لكن كان واحد تافه سرق حاجة من فيلتنا وخربشني

لقيت الدنيا ولعت وكتبوا اغتيال وكلام تاني ما حصلش ولعبت بعدها بشهر وكملت أربع سنين

من ضمن الحاجات اللي بنتعرض لها وإحنا صغيرين الشائعات عليه والكلام بيتعب

ومش عاوز الناس تفهم كلامي غلط لكن ماحدش يقدر يهددني لأن الإنسان اللي اتربي صح مش بيخاف وأنا والدي قائد من اللي اشتغلوا في حرب أكتوبر.

أختي أهم حاجة بالنسبة لي هي وزوجها وعايشين في لندن وهما دول عيلتي

القصة اللي انتشرت قبل سنوات عن أن سبب دخولي مجال الاسكواش كان بسبب تحدي مع شقيقتي اللي هزمتني قصة غلط

كانت بتعلب معايا ما كسبتنيش وما حصلتش الكلام ده والإشاعة دي بقى لها 25 سنة لدرجة ان أختي صدقت نفسها أنها كسبتني

قصة دخولي عالم البيزنس الموضوع في البداية كان صعب جدًا وصعب أني أكون مسؤول عن عمال والموضوع كان كبير عليا

وكنت في وقت من الأوقات من خمس سنين وقعت واقعة كبيرة جدا وكنت ولا حاجة لحد ما اتعرفت على صديقي هاني المصري زي أخويا وشريكي في كل حاجة

ابتدينا الشغل واشتريت حديد واشتغلت في الخردة وقال لي هنعمل برادة لمقالاوت

ابتديت واجتهدت من 5 سنين بقيت أروح للمقاولين وماكنتش بتكسف وكانوا بيتكسفوا مني وواحد أداني مصنع

واسمي خدمني وحب الناس لا يشترى والحمد لله أبتدينا في تجارة الحديد عملنا اسم ناجح