"مراتي أكلها كله من علي النت وبقرف".. مأساة زوج أمام محكمة الأسرة

"كانت موعداني قبل الجواز تعملي حمام ومحشي وطلعت مبتعرفش تطبخ".. بتلك الكلمات روي رجل لـ تحيا مصر من امام محكمة الأسرة عن زوجته التي خدعته بمهارتها في الطبخ، ليكتشف بعد الجواز أنها لم تتعلمه قط وكانت توهمه في البداية بذلك لتثير أعجابه فقط.

كانت بتقولي قبل الجواز هخليك تدمن أكلي ومتدخلش مطاعم تاني 

بدأ الزوج حديثه لتحيا مصر من امام محكمة الأسرة:"أنا راجل شرقي وأصلي صعيدي ومن ضمن الحاجات اللي شدتني في مراتي قبل الجواز أيام ما كانت زميلتي في الشغل أنها كانت بتقولي أن طبخها كل الناس بتحلف بيه أتخطبنا ولما كنت بروحلهم البيت أزورهم كانت بتقدملي المحمر و المشمر وبتقولي أن دي عمايل أيديها وبصراحة الأكل كان ولا أكنه في المطاعم ولما كنت بقولها كدة كانت بتقولي":أنا هنسيك اكل المطاعم وأكل والدتك وأخليك تدمن أكلي انا".

طلعت مبتعرفش تعمل غير كوباية شاي 

وتابع من امام محكمة الأسرة:"بعد الجواز أكتشفت اللي صدمني منها ومن اهلها طلعت مبتعرفش تعمل في المطبخ غير كوباية شاي، ولما سألتها أمال الأكل اللي كنتي بتأكلهوني أيام الخطوبة ده كان أية ؟ قالتلي:"بصراحة كان كله أكل دليفري، و أضطريت أكدب عليك وأقولك أنه أكلي عشان كنت معجبة بيك وخوفت أقولك أني مبعرفش أطبخ أحسن تطير من أيدي ومتتجوزنيش وخصوصا أني عارفة أنك بتهتم بقصة الأكل دي لكن انا طول حياتي كانت امي هي اللي بتعمل كل حاجة في البيت ومسابتليش فرصة أتعلم".

حاولت تقلد أكلات من علي النت وفلوسي كلها أتصرفت علي الدليفري

وأستكمل من امام محكمة الأسرة:"حاولت أمتص غضبي منها لأننا عرسان جداد وقولت أديها فرصتها تتعلم قولتلها أتعلمي من والدتك او من والدتي الطبخ  أهم علي الأقل ستات كبيرة ونفسهم حلو في الاكل وأكيد لما تتعلمي منهم هتبقي زيهم  قالتلي لا أكلهم كله تقليدي وأنا عايزة أعملك حاجة جديدة  بدأت تجيب وصفات لأكلات غريبة و أجنبية من علي النت وكل مرة كنا بنرمي الأكل في الزبالة لحد ما بقيت أضطر أصرف كل فلوسي علي الدليفري والأكل من برة وطبعا دي مش عيشة الواحد يرتاح فيها ولا يبني عليها مستقبل عشان كدة قررت أني أنفصل عنها بطلاق رسمي وألا هيتخرب بيتي".