عمرو يوسف: باولا باتون سايبة توم كروز وجاية تمثل مع العبد لله.. والجدل حول مسلسلي الجديد مش وحش

تحدث الفنان عمرو يوسف عن تفاصيل مشاركته في مسلسل "وعد إبليس" من خلال مداخلة هاتفية له في برنامج "Trending"، حيث كشف عن مشاركة الممثلة الأمريكية باولا باتون في المسلسل وتجربته معها.

تحيا مصر يرصد أبرز تصريحات عمرو يوسف عن مسلسله الجديد وعد إبليس

وقال عمرو يوسف: "باولا سايبة توم كروز ودنزل واشنطن، وجاية تمثل مع العبد لله، والست اشتغلت مع الهوليوود سوبر ستار، وكنت لسة بستكشف الشخصية هتعامل معاها إزاي خاصة إني أول مرة أقابلها، وهي على المستوى الإنساني بني آدمة جميلة ومتعاونة وبذلت مجهود كبير، وأنا استمتعت بالشغل معاها وفريق العمل كله سعيد بالعمل معاها، ولسة دورها هيوضح في الحلقات اللي جاية أكتر".

فتحي عبد الوهاب ونيللي كريم

ومن جانبه، أعرب عمرو يوسف عن سعادته البالغة بتعاونه لأول مرة مع الفنان فتحي عبد الوهاب، حيث قال: "فتحي عبد الوهاب، من الناس اللي اتشرفت وانبسط إننا قربنا من بعض وبقينا أصحاب أكتر من خلال العمل ده، لإنه إنسان مثقف ومتحضر، كنت بستمتع بالشغل معاه والحديث معاه في الكواليس عن شخصياتنا، لدرجة إن وصلنا في مرحلة من التفكير هو غرض الشيطان إيه والإنسان إيه؟ ده كان شغل ممتع جدًا".

وأضاف عمرو يوسف في حديثه تفاصيل مشهده مع النجمة نيللي كريم، حيث قال: "مشهدي مع حبيبتي اللي شرفتنا وأضافت لينا نيللي كريم، في المشهد ده بالتحديد هو إبراهيم مكنش شخصيته التانية، وهو كان بيعافر، وهي كانت عايزاه يستسلم والشيطان كان عايزه يستسلم، والبني آدم طلع القمر، ولو كان استسلم مكنش طلع من الكهف".

رأي عمرو يوسف بشأن الجدل المثار حول مسلسل "وعد إبليس"

ومن ناحية أخرى، تطرق الفنان عمرو يوسف في حديثه عن المسلسل إلى الجدل المثار حوله، حيث قال: "الجدل مش وحش، والموضوع ده لو كُنا دخلنا في تفاصيل تانية كان ممكن يحصل مشاكل، ولكن موضوع المسلسل إنساني مش بيتكلم عن إبليس، ولكن بيتكلم عن الاختبارات اللي بيتحط فيها الإنسان، لأن دايمًا مفيش حد عارف الاختبار الحقيقي هيجي امتى".

تفاصيل شخصية عمرو يوسف في مسلسل"وعد إبليس"

كما أوضح عمرو يوسف لـ برنامج "Trending" تفاصيل شخصيته في مسلسله الجديد "وعد إبليس"، حيث قال: "إبراهيم هو لحم ودم وبيخاف على بيته ومراته والهدية اللي ربنا إدهاله اللي هي الطفل، وكان عايز يمشي في سكة معينة وحصل اللي حصل وخدته في سكة تانية، وتصرفاته كانت غصب عنه ودي أولى عوارض إنه باع روحه للشيطان".

واستطرد: "شخصيتي بالعمل من الأدوار اللي بتيجي للممثل علشان تستفزه، علشان يحاول يطلع شخصيتين في شخصية واحدة، الحقيقة بذلنا مجهور كبير، وظروف العمل مهيئة للتحضير الجيد جدًا، أنا عملت بروفات كتير أوي، ومخرج العمل من المخرجين اللي بيوجهوا الممثل وبيشتغلوا عليه".