"قالولي فوت شهر وكلمنا".. هيثم شاكر يروي تفاصيل أول خطوة في مشواره الفني

تحدث المطرب هيثم شاكر عن تفاصيل وكواليس أول خطوة في مشواره الفني بمجال الغناء، والتي بدأت أيام دراسته الجامعية عن طريق أحد زملائه.

تحيا مصر يرصد تفاصيل أول خطوة في مشوار هيثم شاكر الفني

حيث قال هيثم شاكر في حواره مساء اليوم مع الإعلامية منى الشاذلي: "لما دخلت الجامعة ابتدى كل اللي غاوي مازيكا يتلم على بعضه، يعني اللي بيغني اللي بيلعب جيتار اللي بيعزف كيبورد واتكوننا شلة، لغاية ما في يوم جالي واحد صاحبي قالي أن فيه شركة إنتاج فتحت جمب بيته بيعملوا شريط كوكتيل وبيدوروا على أصوات جديدة.. هو في البداية كان واخد الموضوع هزار، يعني هو شاف حكيم طالع الشركة فسأل البواب قاله ايه دا هو حكيم ساكن هنا، فراح قاله لا دا فيه شركة إنتاج فوق بيعملوا أغاني ومازيكا".

بداية هيثم شاكر الفنية

وتابع هيثم شاكر قائلًا: "فصاحبي طلع وقالي أنه لقى ناس محترمين جدًا وشركة إنتاج بجد وبيدوروا على أصوات جديدة فاخد رقم المنتج وجابهولي عشان أكلمه وأروح، واخدت الرقم وقعد معايا خمس شهور لأني كنت متردد لغاية ما في يوم كلمته وعرفته بنفسي وقولتله أنا سمعت أنكم بتدوروا على أصوات جديدة قالي اه مظبوط بس فوت شهر وأبقى كلمني تاني".

وأكد هيثم على استغرابه من كلام المنتج ويقينه وقتها بأنه لا توجد فرصة له في تلك الشركة، حيث قال ببرنامج "معكم منى الشاذلي": "فأنا استغربت وقولت أكيد بيفسحني وبيقولي أي كلام فاستنيت شهر وروحت مكلمه تاني قالي اه فاكرك تعالى بكرا وروحت وغنيت فقالي طيب كويس هنكلمك.. فقولت بس مفيش أمل، فاخدت بعضي وماشي فجه ورايا عند الأسانسير فقالي معلش شركائي عايزين يسمعوا صوتك تاني، وبعدها قالي مبروك أنت معانا وإن شاء الله بنعمل ألبوم كوكتيل هيبقى فيه حكيم وحميد الشاعري وبنقدم 7 أصوات جديدة أنت واحد منهم ويالا بقى عشان نبتدي نسمع الأغاني ونختار".

هيثم شاكر وحميد الشاعري

ومن ناحية أخرى، أعرب هيثم شاكر عن سعادته البالغة بأن تكون أول أغنية له في مشواره الفني من توزيع الفنان حميد الشاعري، حيث قال: "وابتدينا نشتغل على الألبوم، كان حكيم عامل أغنيتين وحميد الشاعري عامل أغنيتين، ولو أوصف فرحتي اد ايه بأن أول أغنية هعملها في حياتي هتبقى توزيع حميد الشاعري.. أنا مكنتش مصدق، يمكن أنا من الناس المحظوظين في الدنيا أن أنا أول حاجة أعملها في حياتي تبقى من توزيع العبقري حميد الشاعري".

واختتم هيثم شاكر قصة أول خطوة في بدايته الفنية قائلًا: "وبعد ما خلصنا الألبوم كنت عايز انسحب عشان كل الاغاني كانت مقسوم وأنا أغنيتي الوحيدة هي اللي كانت دراما، بس أستاذ فايز قالي أصبر والأغنية هتنجح، وبالفعل الألبوم والأغنية نجحوا".