هيثم شاكر يكشف تفاصيل إصابته بسرطان القولون: "كنت مستني الموت"

حل الفنان هيثم شاكر ضيف برنامج معكم منى الشاذلي، بعد حفلته الأخيرة التي جاءت بعد غيابه عن الوسط الفني لمدة طويلة بسبب إصابته بمرض سرطان القولون.

تحيا مصر يرصد لكم كشف هيثم شاكر عن تفاصيل مرضه بسرطان القولون

هيثم شاكر: كنت مستني الموت

وقال هيثم شاكر: اكتشفت ان عندي سرطان في القولون، وحسيت إن حياتي انتهت واستسلمت وكنت مستني الموت، لكن مع العلاج ابتديت أمسك في الحياة لحد ما أنعم الله عليا بالشفاء.

وتابع عن سبب عدم الإفصاح لوالدته عن حقيقة مرضه، قائلًا: متعود اشيل اللي حواليا محدش يشيلني، وبتحمل مسؤلية كل الناس اللي حواليا، ومبحبش اصعب على حد ووالدتي توفت من غير ماتعرف ان عندي سرطان القولون، وسافرت اتعالج برا مكنتش قايل غير لزوجتي.

هيثم شاكر عن والدته 

وأكد على مدى حبه لوالدته الراحلة التي كانت وفاتها صدمة كبيرة له، قائلًا: أمي كانت بالنسبالي كل حاجة واقرب شخص ليا، وهي مكنتش هتستحمل لما تعرف، ووفاتها كسرني.
المواقف بتبين الناس على حقيقتها، وفي ناس قريبة مني كانوا عارفين وملاقتهومش جنبي، وناس مكنوش قريبين مني بقوا يستاهلوا انهم يبقوا قريبين.

وأضاف هيثم شاكر: كنت مستسلم في البداية، وكان في دكتور نفسي بيتابع معايا الحالة بتاعتي، قالي حاول تعيش اليومين اللي فاضلين، مش انت مستسلم؟
واستكمل كلامه: وبدأت اتشبث بالحياة أكثر، وكنت شغال في الألبوم بتاع أحلى قرار، والملحنين بيبعتوا أغاني، وبنزل مصر أغني وأرجع تاني اتعالج، وبعدين ربنا من عليا بالشفاء.

إصابة هيثم شاكر بسرطان القولون

وصرح عن موعد اكتشافه سرطان القولون، قائلًا: وابتدت القصة بالصدفة، لما حصل عندي مشاكل في المعدة وأدى لعملية ثقب في المعدة وعملنا ترقيع، وانا بتعالج من المعقدة اكتشفت سرطان القولون.
واختتم هيثم شاكر حديثه: الحياة مش مستاهلة صراعات ولا سباق، وربنا بيعمل الأصلح والأحسن للبني أدم، مهما جريت واتشقلبت ربنا هيعمل اللي عايزه.

ومن ناحية أخرى، أعرب هيثم شاكر عن سعادته البالغة بأن تكون أول أغنية له في مشواره الفني من توزيع الفنان حميد الشاعري، حيث قال: "وابتدينا نشتغل على الألبوم، كان حكيم عامل أغنيتين وحميد الشاعري عامل أغنيتين، ولو أوصف فرحتي اد ايه بأن أول أغنية هعملها في حياتي هتبقى توزيع حميد الشاعري.. أنا مكنتش مصدق، يمكن أنا من الناس المحظوظين في الدنيا أن أنا أول حاجة أعملها في حياتي تبقى من توزيع العبقري حميد الشاعري".