أنا مش ديكتاتور مع بناتي وهما أحلى حاجة في الدنيا.. أبرز تصريحات أحمد سلامة التلفزيونية

حل الفنان أحمد سلامة اليوم ضيفًا في برنامج "الستات ميعرفوش يكدبوا" الذي يذاع على شاشة تلفزيون قناة "سي بي سي"، وأثناء الحلقة تحدث أحمد سلامة عن الكثير من الأمور التي تخص حياته الفنية والشخصية أيضًا، وفي هذا التقرير يرصد موقع تحيا مصر أبرز تصريحاته في الحلقة.

أبرز تصريحات أحمد سلامة

- أول حاجة عملتها في حياتي في الفن كنت طفل عندي خمس سنين كان قصر الشوق مع حسن الإمام

- كنت بخاف من المخرج حسن الامام عشان شكله.. هو شخصية طيبة جدا بس كان بيخليني اعيط ولما كنت بشوفه مبمثلش

- أنا مقدرش اعدي أسبوع من غير ما اروح حي السيدة زينب واشوف صحابي وليا فيها ذكريات كتير جدا مع اسرتي ورمضان والمناسبات

- الاستاذ يوسف شاهين كان طالب من الاستاذ سيف عبد الرحمن عايز 3 صحاب يمثلوا مش 3 ممثلين يعملوا صحاب ف الفنانة رجاء حسين زوجته كانت تعرف مدام إنعام الجريتلي وعارفة أد ايه احنا صحاب وبتحبنا جدا، فشاورت له علينا

- بناتي السبعة مسئولية بس مش دوشة لأن أجمل حاجة في الدنيا البنات.. البنات شيء راقي ورقيق وتفاصيلهم حلوة وحنينيين

- سارة وزينب بناتي أنا لا يمكن كنت هسيبهم يشتغلوا الشغلانة دي إلا لو كانوا موهوبين

- كريم ابني مرة قالي عايز أمثل فقولتله لا عشان محستش أنه عنده الموهبة

- بناتي مش بيعملوا غير لما ياخدوا رأيي، وأنا بسيبهم يختاروا اللي عايزين يعملوه

- أنا مش ديكتاتور معاهم إلا في حاجات معينة

- أبويا كان رافض أخش المعهد وقالي لما اروح اخطبلك أقول ايه يعني

- وخلاني اخش كلية حقوق ومن وراه عملت مستخرج رسمي ودخلت الاكاديمية فكنت في أولى حقوق وأولى معهد في سنة واحدة

- ولحد ما توفى معرفش لأنه توفى وانا في سنة اولى

- أبويا كان دايما يقولي الراجل موقف لما يتحط فيه يبقى راجل وعلمني حاجات كتير منها احترام الكبير

ـ أنا والدي شغال في مصر للسياحة وكان ايامها بيأجروا الباصات عشان ينقلوا الفنانين لاستديو مصر

ـ ومرة ابويا خدني معاه الشغل فقاعد بهزر فشفوني وقالوا لابويا فيه اطفال معانا ما تجيبوا وفعلا خدوني وشافتني هناك مدام انعام الجريتلي وخدتني لفرقة اطفال التلفزيون وكان معايا ممدوح عبد العليم ومحسن محيي الدين وعبد الله محمود