فتحي عبد الوهاب: طفولتي كانت عادية.. وعيشتي مع جدي وجدتي خليتني طفل مش شقي

تحدث الفنان فتحي عبد الوهاب عن تفاصيل طفولته في حواره ببرنامج "AB Talks" مع أنس بوخش، وكشف عبد الوهاب أن طفولته كانت عادية، وتربيته مع جده وجدته جعلت منه طفل هادي.

تحيا مصر يرصد تفاصيل أبرز تصريحات الفنان فتحي عبد الوهاب عن طفولته

حيث قال فتحي عبد الوهاب: "الطفولة كانت عادية مفيهاش أحداث جسيمة، أكتر من أن أنا كنت بعيش مع جدتي وجدتي لأمي، لأن أنا أبويا وأمي كانوا دايما مسافرين ويمكن دا كان سبب في أنه أبقى أنا مش طفل شقي، لأنه ببقى عايش طول الوقت مع ناس كبار فمكنش فيه فرصة للشقاوة.. وكان من أميز الحاجات اللي أنا ممكن أعملها أن أنا أقرا بس كانت المشكلة أن الكتب دي بتاعت جدي".

وتابع فتحي عبد الوهاب في حديثه عن تفاصيل طفولته قائلًا: "وأنا عندي خمس سبع سنين كان فيه كتاب في المكتبة الغلاف بتاعه ملون، وأنا قعدت أقرا فيه يمكن شهور كتير كملت فيه أربع ورقات بس وأنا مش فاهم فيهم حاجة بس عشان الغلاف بتاعه ملون والكتاب كان اسمه حرب الأيام الستة".

فتحي عبد الوهاب وعلاقته بوالديه

كما أوضح الفنان فتحي عبد الوهاب أنه كان يتواصل مع والديه في طفولته عن طريق التليفون أو رؤيتهما في الإجازات الصيفية، حيث قال: "في طفولتي كنت بتواصل مع أهلي في التلفون أو بشوفهم في الاجازات، وكان في الغالب أن الاجازات دي كانت مش بتبقى في القاهرة، يعني كان ممكن الصيف يبقى في اليونان أو أسبانيا".

وأضاف قائلًا: "والصيف اللي كان بيبقى في القاهرة كنت ببقى عايش مع بقيت عيلتي الكبيرة.. وجدي كان بيروح بلده في الريف عشان جدي كان عنده سينما وتقريبا دي كانت السينما الوحيدة في الأقليم.. وعيشتي في الريف خليتني احب الزراعة عشان جدي كان عنده كدا جناين.. فأنا حبيت الزراعة جدا ولغاية دلوقتي".

أخر أعمال فتحي عبد الوهاب

من الجدير بالذكر أن أخر أعمال الفنان فتحي عبد الوهاب مسلسل “جزيرة غمام” الذي تم عرضه على شاشات التلفزيون في الموسم الرمضاني الماضي، وكان من بطولة عدد كبير من النجوم، منهم: أحمد أمين، طارق لطفي، مي عز الدين، فتحي عبد الوهاب، وغيرهم.