زرعة خايبة.. مصطفى كامل يطرح أحدث أغانيه عبر يوتيوب

طرح الفنان مصطفى كامل، أحدث أعماله الغنائية و التي تحمل اسم زرعة خايبة، عبر قناته الرسمية بموقع الفيديوهات الشهير يوتيوب.

تحيا مصر يرصد طرح أحدث أغاني مصطفى كامل. 

أغنية زرعة خايبة

أغنية زرعه خايبة، من كلمات وألحان مصطفى كامل، وتوزيع وميكس ماستر كلوبيكس.

كلمات أغنية زرعه خايبه غناء مصطفي كامل

وتقول كلمات أغنية زرعة خايبة للفنان مصطفى كامل:

ياللى ديـمــا تـغـلـطـو فـي غـيـبـتــى
اوعـو بس تغـركم طـيـبـتـــى
كل عاله اتعال واتمـنـظر بكره جاى على حجرى بطريقتى

ياللى ياما في ظهـرى بتلكو وبترغـو وتهرو وتعكو
واللى يـسمع اسمى يتزرزر
واللى سيـرتى الحلوه بـتـشـكـه

خــلـو سـيـرتى سايبه ناركـم ولعه قايده
خلو القـسـوه والعـداوه بـنـا ذايـــده
انا م النهارده لحد اخر يوم في عــمرى
مفـيش ما بـنـا لـتـعـازى ولا معايده

خــلـو سـيـرتى سايبه ناركـم ولعه قايده
خلو القـسـوه والعـداوه بـنـا ذايـــده
شاهد عـلـيـنا ربنا وسلمت امرى
ما انا عملت الخير كتير ومجاش بفايده

انتو ناس ولا لـيكم لازمه في حـياتى وجـودكم كان ازمه
انا دايما كـنـت مـنـكم حـريص

نــــاس فـــالـصــو لـديـور ولا جوتـشى
وتـمـنـكـم يدوب تمن كوتــشـى
تايوانى م اللى سعره رخيص

انتو ناس م الاساس زرعه خايبه وعايزه فاس
اشيل جدورها وح الغى دورها
واخـتار حـبايبى دهب وماس

خلو سـيرتى سايبه ناركم ولعه قايده
خلو القـسـوه والعـداوه بـنـا ذايده
انا م النهارده لحد اخر يوم في عــمرى
مفــيش ما بـنـا لـتـعـازى ولا معايده

خــلـو سـيـرتى سايبه ناركـم ولعه قايده
خلو القـسـوه والعـداوه بـنـا ذايـــده
شــاهـد عـلـيـنـا ربــنــا وسلمت امــرى
ما انــا عملت الخير كتير ومجاش بفايده

تصريحات مصطفى كامل عن والده

قال مصطفى كامل في تصريحات تليفزيونية: مراتي وصتني وقالت لي لو جت سيرة والدك ما تبكيش على الرغم من أنه متوفى من سنة 1996 لكن كل ما تيجي سيرته أقسم الله ما بإيدي بلاقي دموعي نزلت”.

وتابع: “والحمد لله إنه شاف 4 أو 5 سنين من قمة نجاحي.. والصحافة كانت بتشتمني وكنت من أكتر الناس اللي اتهاجمت حتى في تسلم الأيادي وفي قمة نجاحي اتهاجمت، وأبويا وهو بيحتضر قلت له هسيب الفن، قال لي اوعى”.

وأضاف: “قال خليك واقف وحارب، وبقى هو اللي فرحان بنجاحي.. كل الناس عارفة عني حياتي الخاصة، كنت أول شاعر يكون معروف للناس، وكنت أول فنان يصرح إنه من حواري مصر القديمة ومن شارع القبوة في مصر القديمة اللي قدام كنيسة ماري جرجس ودي منطقتي وبعتز بيها”.

وتابع قائلًا: “مهما أسكن في أي مكان مصر القديمة في دمي، ووالدي كان ظابط وكنت ليه كل حاجة في حياته، لأني كنت الكبير، وكان مصادقني وحبيبه وصاحبه وأمله، وكان عاوزني في كل حاجة لكنه سبب لي مصيبة كبيرة لأني اتحملت وأنا شاب مراهق أحلام أبويا غصب عني، كنت لازم أحققها له وكمان أحلامي”.

وقال أيضًا: “كان عاوز يدخلني كلية التجارة، علشان عمي يعيني في البنك مع إني كنت بكره الحساب، وهربت روحت أدبي علشان مش بحب الكيميا والحساب ولحد النهاردة مش بدير أموري المالية لا في بيت ولا في شغلي ولا اللايف بتاعي، وما عرفش في جيبي كام ماليش في الحسابات فكنت بجري ورا أحلامي”.