كنت شغال في بنزينة ونفسي الاقي زوجة صالحة.. أبرز تصريحات عمر كمال التلفزيونية

حل مطرب المهرجانات عمر كمال ضيفًا في برنامج "تفاعلكم" مساء أمس، وأثناء الحلقة تحدث عمر كمال عن الكثير من الأمور التي تخص حياته الشخصية قبل الشهرة وبعدها، بالإضافة إلى أمور تخص حياته الفنية وأزماته المتتالية.

تحيا مصر يرصد في هذا التقرير أبرز تصريحات عمر كمال في تفاعلكم

أبرز تصريحات عمر كمال

ـ أنا كنت تحت البلاط وجبتها من الصفر وناس كتير بيحقدوا عليا ومش حابين دا

ـ مرة روحت فرح شخص ما معروف ومحترم والناس انتقدتني وقالوا مين دا؟

ـ أنا كنت شغال في بنزينة والزبون مكنش بيفتح شباك العربية يكلمني، ومع ذلك عمري ما حقدت على حد وكنت بقول ربنا يكرمهم ودلوقتي لما بروح بنزينة بنزل بنفسي أسلم على كل الناس

ـ مبعدتش عن المهرجانات بس أنا بحب كل ألوان الغناء ولقيت الجمهور بيحب اللون الشعبي "المقسوم" وبالتالي قررت أعمله

ـ مهمتي هي إسعاد الناس وإني أعدل مزاج المواطن وأشوف بيحب يسمع إيه وأعمله

ـ مش أي واحدة بظهر معاها في صورة يبقى مرتبط بيها لو كدا يبقى هتجوز الدنيا كلها

ـ أنا كان ليا تجربة ارتباط من فترة ومحصلش نصيب وفرحي كان هيبقى آخر الصيف دا

ـ وعمري ما هقول اسمها عشان مدفعش فاتورة غلطاتها، وهيقولوا خطيبة عمر كمال عملت كذا وراحت فين

ـ الحب دا رزق أنا عندي 31 سنة وحبيت مرة واحدة في حياتي، ونفسي ألاقي زوجة صالحة تصوني

ـ لو ارتبطت هقول لأني إنسان صريح ولكن هعلن لما أكون ماسكها وهي جنبي على الكوشة

ـ مش هغني في فرحي لأني غنيت في أفراح كل الناس وتعبت

ـ مش قصدي أعمل جدل في السعودية، اللي حصل إني روحت وهما معروفين بالتمر والحليب والطابع الديني وبهزر مع الناس في الحفلة وبقول ضمن الأغنية:" وأشرب تمور وحليب" والجمهور كان مبسوط ومتفاعل معايا

ـ أنا بعشق السعودية وناسها، وأنا بقيت أقفل بوقي لأن مهنتي هي إني أعدل مزاج المواطن العادي وأبسط الجمهور بالأغاني

أخر أعمال عمر كمال

ومن الجدير بالذكر أن أخر أعمال المطرب الشعبي عمر كمال أغنية "خلينا سهرانين" التي تم طرحها يوم 8 من شهر سبتمبر الجاري عبر قناته الرسمية على موقع الفيديوهات العالمي "يوتيوب"، وقد حققت الأغنية منذ طرحها وحتى الآن أكثر من 399 ألف مشاهدة.