فاتن حمامة قالتلي متعمليش مكياج صفية العمري.. أبرز تصريحات الماكيير محمد عشوب في "حضرة المواطن"

حل الماكير الشهير محمد عشوب أمس ضيفًا في برنامج “حضرة المواطن” الذي يذاع على شاشة قناة “الحدث” ويقدمه الإعلامي سيد علي، وأثناء الحلقة تحدث عشوب عن علاقته بكل المشاهير الذين تعامل معهم من نجوم ورؤساء جمهورية.

تحيا مصر يرصد أبرز تصريحات محمد عشوب في برنامج حضرة المواطن

أبرز تصريحات محمد عشوب

ـ أنا أهلاوي بس مش متعصب، أنا بحب الكورة الحلوة، والحياة يوم ليك ويوم عليك

ـ زمان كنا بنشتغل وبنصور بالأبيض والاسود، ودا مكنش بيظهر فعاليات المكياج، لأنه كان بيعتمد على اللون البرتقالي اللي يبقى أبيض على الشاشة

ـ زمان اشتغلت في فيلم مساعد ماكيير مع العظيم أستاذ أحمد خورشيد، كان اسمه العنب المر وكان من بطولة لبنى عبد العزيز وإيهاب رمزي، فالاستاذ أحمد خورشيد حب يعمل تجربة أنهم ميعملوش مكياج ويصوروا على الطبيعة طلعوا كلهم سمر

ـ أنا كان ليا الحظ أن مفيش نجم في مصر سواء في مصر أو برا مشتغلتش معاه، زي فاتن حمامه، عمر الشريف، فريد شوقي، نادية الجندي، نبيلة عبيد، ليلى طاهر، ليلى فوزي، سميحة أيوب، وغيرهم

ـ لما جيت اشتغلت مع فاتن حمامه  في ضمير أبلة حكمت كنت بشتغل ساعتها مع صفية العمري في مسلسل ليالي الحلمية، ففاتن قالتلي بص يا محمد أوعى تعملي مكياج صفية العمري، وفاتن كانت بتحب تعمل مكياج خفيف خالص كأنه مفيش مكياج

ـ أنا لما كنت بحط ايدي على وش ميرفت أمين واشيلها تعلم

ـ معظم رؤساء العالم أنا كنت بعمل لهم مكياج زي الرئيس حسني مبارك، هو كان بيكره المكياج وقالي أنا حبيت المكياج لما روحت أمريكا قالولي لازم تعمل مكياج فعمل، ولما جه مصر رشحوني ليه وقولت لهم دا شرف ليا

ـ انا مسمي ابني على اسم عادل إمام، وهو صديق عمري وعلاقتي بيه علاقة أخ وعشرة عمر

ـ أحمد زكي قال إن محدش هيعرف يعمل السادات غير عشوب

ـ عمر الشريف قالي لو أحمد زكي بيعرف يتكلم إنجليزي كنت خدته هوليود

ـ رموش سعاد حسني كانت صناعية

ـ سعاد حسني وضعت رموش بسيطة في الزوجة الثانية، ولكن صلاح أبو سيف اعترض وقالي زوجة أبو العلا اللي رجلها في الطين تحط رموش