بلطجية داخل المستشفي..موظف أشعة: شخصين ضربوني بالعكاز على دماغي وزملائي أنقذوني من الموت|فيديو
ADVERTISEMENT
"طول عمري بعامل ربنا في المرضي بتوعي وفي الأخر دي كانت جزاتي أنهم يضربوني على دماغي العكاز وعيني كانت هترح مني".. بتلك الكلمات روي محمد علام فني الأشعة لـ تحيا مصر تفاصيل أعتداء شابين عليه داخل مستشفى بالغربية أثناء تأدية عملة.
«تحيا مصر» إنتقل إلي منزل المجني عليه ليروي تفاصيل الواقعة يقول محمد علام:"أنا شغال فني أشعة في مستشفي المنشاوي بطنطا، واليوم اللي جالي فيه المتهمين كان عندنا فيه ضغط شغل كبير جدا من العيانين، وأنا وظيفتي أني أصور الأشعة علي جهاز للعيانين عشان يرجعوا بيه للدكتور بتاعهم، ولقيت اليوم ده واحد داخل من باب مش مسموح للحالات أنها تدخل منه لأنه الباب اللي بيدخل منه العاملين، فطلبت منه بكل أحترام أنه يطلع ويدخل من باب الحالات أفضل عشان ده نظام المستشفي، وهو فعلا خرج بره بس كان الغضب مالي وشه و أنا قلبي مكنش مستريح له".
جهاز الأشعة هنج ودي كانت بداية المشكلة
وأستكمل محمد:"قبل ما المتهم الأول، واللي أسمه أسلام ييجي دوره عشان يصور الأشعة بتاعته، كان فيه قبله حالتين بس هو كان مستعجل جدا وأنا طلبت منه لتاني مرة أنه ينتظر برة لحد ما دوره ييجي, وهنا كان بدأ يشتم بأسوأ الألفاظ وبصوت عالي، وأنا عشان متعودتش أرد علي شخص بيغلط فيا وخصوصا في مكان شغلي فتجاهلته، وكأني مسمعتوش، وبعد ما أستني شوية برة لحد ما دوره ييجي، دخل بعدها وقالي خلصت ولا هستني تاني؟، قولتله معلش الجهاز بتاع الأشعة هنج من ضغط العيانين أول ما هيشتغل هنده أسمك، وهنا كانت بداية المشكلة ".
أتزقوا عليا واحد ورا التاني
وتابع محمد :" فضلت قاعد شوية في العيادة لوحدي مستني الجهاز يشتغل, واتفاجأت بأسلام دخل عليا ومعاه واحد صاحبه أسمه عبدالله وكانوا جايبين معاهم شنطة بيضة كبيرة وحاطين فيه عكاز عشان يعرفوا يدخلوا بيها المستشفي، قفلوا الباب عليا وأسلام اللي جالي أول مرة قالي أنا أصلا مش جاي عشان أعمل أشعة أنا جاي عشان أضايقك زي ما بتضايقوا العيانين ومش بتدوهم أي أهتمام، وبعدها ضربوني اول ضربة في دماغي بالعكاز والضربة دي جابتلي حالة زي عدم أتزان, والضربة التانية كانت في عيني وفقدت الوعي بعدها وهما كانوا هربوا، ومفوقتش غير وأنا في القسم زمايلي ودوني هناك وحاولوا يفوقوني عشان أحرر محضر بكل اللي حصل".
معرفش ذنبي أية في ده كله وعايز حقي
وأختتم محمد حديثه لـ تحيا مصر:" أنا بس نفسي أعرف أنا ذنبي أية عشان يحصلي كل ده، انا واحد براعي ربنا في شغلي وبعامل كل العيانين بضمير وأمانة، أنا عيني بتروح مني ومعرفش مصيرها هيكون أية، وكل اللي بطالب بيه حقي من الشابين دول لأني لأخر يوم في عمري مش هنسي أنهم أذوني ظلم".
جوجل نيوز
تطبيق نبض
