"كان عندي 33% بس من قلبي اللي شغالين".. محمد عبدالرحمن يروي تفاصيل مرضه لأول مرة

تحدث الفنان محمد عبد الرحمن عن أزمته الصحية في أول ظهور له بعد عمليته الجراحية الذي خضع لها منذ أيام، وذلك خلال ضيافته في برنامج “معكم” الذي تقدمه الإعلامية منى الشاذلي.

تحيا مصر يرصد في ذلك التقرير تصريحات محمد عبد الرحمن عن أزمته الصحية

محمد عبد الرحمن: اللي حصلي كان حاجة كبيرة وروحت المستشفى على رجلي

قال محمد عبدالرحمن خلال البرنامج: "للي حصلي كان حاجة كبيرة أوي بس محستش بيها، إحنا هنا بنخاف من وجهة الدكاترة الدكاترة وكدة فممكن الواحد دراعة يتكسر قدامه ويركبه هو ويقول أنا تمام عادي، أنا كنت ديما حاسس بتعب بس مكنتش عايز أروح للدكتور، وكمان كنت مدخن ومكنش عندي فكرة إني عندي حاجة في القلب وبيجيلي أدوار عادية برد وكدة”.

محمد عبد الرحمن: كنت فاكر أنه دور برد طلع عندي 70 % من القلب مش شغال

وتابع محمد عبد الرحمن حديثه، قائلا:“وأنا راجع من تصوير الدعوة عامة حسيت إن صدري تعبني افتكرت دور برد من التكييف، بعدها فضلت أكح كتير والأكسجين قل وضربات قلبي بنزيد، وروحت المستشفى بنفسي بس حسيت نفسي بيقل، وبعدها دخلت ظبطولي الأكسجين وقالولي مش هتنفع تخرج النهاردة خليك لبكرة وكنت خلاص هخرج وأروح التصوير".

واستكمل عبد الرحمن تفاصيل رحلة مرضه،قائلا: “الدكتور طلب عشان يطمن سونار على القلب وكنا بنهزر عادي وكدة وفجأة لقيت الدكتور مصدوم، وبعدين قام قايلي هو انت المفروض تعمل دعامة في القلب ولا حاجة ومعملتهاش ولسة على وشة الصدمة، طب أخدت أدوية قلب وبطلتها؟ وأنا أقوله لا ومش فاهم هو شاف إيه، بعدها قالي لا زي الفل ماشي وهو مصدوم، بعدها اكتشفت إن القلب شغال 33% منه بس، ومحدش كان فاهم أنا ماشي ازاي  وعملت القسطرة وقولت هخرج على طول، وبعدها سمعت كلام إنجليزي كتير فكنت بحاول ألقط حاجات".

محمد عبد الرحمن: اتخضيت أما عرفت إني هعمل عملية قلب مفتوح

واختتم محمد عبد الرحمن حديثه: “خرجوا وقالولي احنا مركبناش دعامات، وفي قرارات مينفعش ناخدها لوحدنا فقولته دا قلب مفتوح، واتخضيت وبقت أقول الحمدلله، وبقيت واحدة واحدة أتقبل الموضوع، وليلة العملية مكنتش حاسس في حاجة، قعدت فيهم 7 ساعات عملت فيهم 3 شرايين كانوا مسدودين، كان عندي جهاز في زوري مكنتش قادر أتكلم بسببها، وأول كلمة طلعت مني بعد ما شيلته كلمة الحمدلله”.