الرقص كـ فن حلو بس التعرية حرام.. أبرز تصريحات الفنانة هندية لـ موقع تحيا مصر

ظهرت الفنانة المعتزلة هندية في بث مباشر عبر الصفحة الرسمية لموقع تحيا مصر على موقع التواصل الاجتماعي "فيسبوك"، وأثناء البث تحدثت الفنانة هندية عن خلافاتها مع شقيقها الأكبر وأولاده بعدما تعرضت للنصب منهم، بالإضافة إلى الكثير من الأمور التي تخص حياتها الشخصية والفنية.

تحيا مصر يرصد في هذا التقرير أبرز تصريحات الفنانة هندية

أبرز تصريحات الفنانة هندية لـ موقع تحيا مصر

- ولاد أخويا جوزتهم في شققي كل واحد اديت له شقة، وفي الأخر نصبوا عليا وعايزين ياخدوا الشقق ورموني في الشارع

- اعتزلت في سن صغير عشان كان عند أخ مات قدام عيني وقولت يا نهار أبيض أنا ممكن أموت في أي لحظة كمان

- أول جوازة ليا كانت على رجل الأعمال أيمن السويدي، وفضلنا متجوزين سنتين ونص، وانفصلنا عشان هو كان قمر وكل البنات بتعاكسه فكنت بغير

- وساعتها حصل حمل بس هو كان مش بيحب الولاد فحصل إجهاض وبعد كدا ربنا مرزقنيش بأولاد

- الرقص كفن حلو بس التعرية حرام

- لما بلاقي واحدة كبيرة بترقص بزعل، وبقول طب هي ازاي مش عارفة ان فيه موت

- الراقصة كبيرها 35 سنة والمفروض تعتزل وبقول للي عدوا السن دا سيبي الفن قبل ما يسيبك

- لما دخلت الفن أسرتي خاصموني وكانوا ما بيكلمونيش وقاطعوني

- جوازاتي التانية استمرت 11 سنة وكان حد محترم وكان شايلني على راسه وعمره ما هاني ولا قل أدبه عليا وكانت عيشة جميلة وسافرنا عمرة مع بعض وحج وكان بيشتغل أستاذ جامعة بيدرس قسم إعلام، وانفصلنا لانه كان عايز ولاد

- مش بندم على اللي فات في الفن لان اللي فات دا انا دايما بقول انا راضية بقضاء ربنا سبحانه وتعالى

- أنا عاملة دلوقتي ندوة شعرية غنائية وبغني فيها ومعايا مطربين ومطربات بس هما مش مشهورين أوي

- كنت من عشاق شادية هي وسعاد حسني، وهي أستاذة في كل المجالات، بس متعاملتش معاها خالص ولا قابلتها

- الوحيدة اللي قابلتها هي الاستاذة وردة وكانت سهرانة عندي مرة وقعدت اقولها من فضلك اطلعي غني فقالتلي لا مش بعرف اغني لايف وبعدين عشان فرقتي غير فرقتك

- ومن كسوفي غنيت ليها اغنية في يوم وليلة وسقفتلي