الفنانة هندية لـ تحيا مصر: ولاد أخويا جوزتهم في شقتي ونصبوا عليا وعايزين يرموني في الشارع

كشفت الفنانة هندية لموقع تحيا مصر التفاصيل الكاملة لتعرضها للنصب من قبل أخوها الأكبر وأولاده، بعدما أعطتهم شقتين من أموالها وأخذوها دون دفع ثمنها.

تحيا مصر يكشف القصة الكاملة لتعرض الفنانة هندية للنصب من أخوها وأولاده

حيث قالت الفنانة هندية في بث مباشر لها من خلال الصفحة الرسمية لموقع تحيا مصر على موقع التواصل الاجتماعي “فيسبوك”: “روحت اشتريت شقة من الجهاز، وبعد كدا كلمت صاحبتي قولتلها أنا عايزة شقة تاني عشان اتعايش منهم، وهي اللي اديتني الفكرة الحقيقة قالتلي فيه في الجهاز دلوقتي معمول فاتحين كراسات شروط أن احنا نشتري شقق، فقولتلها طب أوكيه اشتري شقة، فقالتلي اه اشتري شقة اسكني فيها وشقة أجريها”.

وتابعت قائلة: “وقدمت في الشقق وأنا راجعة من العمرة أنا وأخويا، شقة باسم أخويا وخدتها وبعدها خدت شقة باسم ابن أخويا وبالصدفة كانت معايا صورة بطاقته، ولقيت أخويا بيكلمني في التليفون وبيقولي محتاج منك 50 ألف جنيه عشان اشتري شقة لابني، فقولتله أنا الحقيقة لسه شارية شقتين فمش هقدر أديك سيولة خالص، فقالي طيب وسكت”.

تعرض الفنانة هندية للظلم من قبل أخوها الأكبر وأولاده

وأضافت الفنانة هندية لموقع تحيا مصر: “المهم بعد كام شهر لقيته بيقولي فيه بنت جارتنا ابني معجب بيها جدا، فقولتله معقول دا لسه مخلص جامعة قالي أه واحنا مش عارفين نعمل ايه، وعايزك انتي تيجي تطلبي ايدها قولتله يا نهار اسود أنا اطلب ايديها ما فيه رجالة كتير يرحوا يطلبوها، وبعد كدا ربنا يسر وروحت أنا وأخويا الكبير روحنا طلبنا أيد البنت”.

وتابعت: “وقبلها قاللي ما انتي عندك شقتين اديني واحدة منهم حتى اجوز فيها الواد وإن شاء الله أول ما أخرج معاش هدي لكل واحد في عيالي الاتنين دا النص ودا النص مقدم شقق وهما بعد كدا يقسطوا ويخرجوا من الشقتين بتوعك، فقولتله حاضر واديته الشقة اللي باسمه واداها لابنه”.

علم الفنانة هندية بسرقة شقتيها من قبل أخوها وأولاده

وأشارت الفنانة هندية إلى أنها أعطت الشقة الأخرى إلى ابن أخوها الآخر، حيث قالت: “وبعد سنتين بالظبط قاللي دا الواد التاني غار وعايز يتجوز هو كمان، فقولتله تمام يعني عايز ايه، قاللي عايز الشقة التانية ووعدي زي ما هو والكلام دا كان قدام مراته اللي جاتلي البيت وقالتلي، بقولك ايه يا حاجة الشقق باسمنا واعملي اللي انتي عايزاه”.

وأضافت: “وبعد الكلام اللي قالته مرات أخويا دا منمتش ودماغي ضربت دم، وجارتي كلمتني قالتلي ألحقي في ناس بتنزل العفش فروحت خبطت على الباب لاقيت محامي اللي فتحلي وقولتله الشقة دي بتاعتي، قالي لا شقتك ايه انا شاريها من واحد اسمه عمرو روحت واقعة من طولي”.