أحمد سالم: نفسي أعمل أغاني تعيش مع الأجيال.. وهذا ما دار بيني وبين رامي جمال

كشف الشاب النقاش الموهوب في الغناء أحمد سالم عن بداية موهبته، واستعمالها في عمله بالنقاشة لإخراج أفضل ما عنده، بالإضافة إلى تفاصيل مكالمته مع المطرب الشاب رامي جمال.

تحيا مصر يرصد أبرز تصريحات النقاش الموهوب في الغناء

حيث قال أحمد سالم أثناء مداخلة هاتفية له في برنامج “التاسعة” الذي تقدمه الإعلامية دينا عبد الكريم: “أنا بغني من وأنا عندي 8 سنين، كنت بغني زمان أغاني للأستاذ حكيم اللي هي الأغاني اللي كان فيها طرب، وفيه حاجات في الطرب وفي حاجات في الشعبي بتعلم معايا وبحاول أني أغنيها، أنما الأكتر اللي بيديني راحة بال في الشغل الطرب عشان فيه حنية شوية”.

أحمد سالم: الغنا في الشغل مزاج

كما أوضح أحمد سالم تأثير الغنا أثناء عمله على صنعته، حيث قال: “الغنا في الشغل مزاج بيعمل كاريزما للواحد وهو شغال، زي الست اللي بتغني وهي بتطبخ فبيطلع أكلها حلو غير الستات التانيين، ومش مهم يكون صوتها حلو، المهم تكون مبسوطة وهي بتعمل الحاجة دي، ولما بيبقى مودي حلو والشغل اللي شغال فيه على هواه ومبسوط فيه وحاسس أنه بيعمل شغل كويس فهتلاقيه هو من نفسه بيجلل”.

اتجاه أحمد سالم للغناء

وأكد سالم لبرنامج “التاسعة” على أن والده هو من كان يرفض دخوله مجال الغناء في صغره، حيث قال: “اتقال لوالدي خلي أحمد يسيب النقاشة ويتجه للغنا، بس والدي كان خايف عليا لأني ولد بعد 3 بنات وليا أخ جه بعد مني بـ13 سنة، فالفكرة مع والدي أني الولد الغالي اللي مينعش يروح ويجيي ويبقى تحت عنيه”.

وتابع قائلًا: “ودلوقتي لازم أفكر في أني اتجه للغنا، واتواصل معايا أستاذ رامي جمال والشاعر عمرو حسن اللي بشكره لأنه هو صاحب الشو دا وأول واحد شير الفديو بتاعي”.

وأضاف: “أنا ورامي جمال اتفقنا على مقابلة، وكل اللي دار بيننا أن احنا اتفقنا على مقابلة بس وهيبقى فيه كلام مع بعض والله المستعان”.

نوع الغناء الذي يفضله أحمد سالم

وأشار أحمد سالم إلى أنه يتمنى أن يقدم أعمال تبقى عبر الأجيال، حيث قال: “وأنا أحب أغني في السكة اللي أنا كنت بغني فيها يعني نفسي أعمل حاجة تفضل موجودة للناس، يعني أنا انتهيت منتهتش تفضل حاجتي دي موجودة زي الست وردة، وأستاذة نجاة، نفسي الحاجة بتاعتي تبقى تراث والأجيال اللي تيجي بعدي وبعد بعدي تفضل فاكرة أن كان فيه مطربين بيغنوا طرب وصوتهم كويس وأغانيهم موجودة أهي على الساحة”.