سليمان عيد عن مشاركته في جزيرة غمام: مكنتش فاضي لما قالولي على المسلسل.. وعايز اللي جي ميبقاش كوميدي

تحدث أبطال مسلسل جزيرة غمام الذي عُرض في الموسم الرمضاني المنقضي، حول التفاصيل الكاملة لمشاركتهم في المسلسل، خلال ندوة تكريمهم بالمركز الكاثوليكي الآن

تحيا مصر يرصد لكم تصريحات أبطال جزيرة غمام حول مشاركتهم في المسلسل

سليمان عيد عن مشاركته في جزيرة غمام 

وقال سليمان عيد: كنت عايز اتحدى نفسي وكان لي تجربة مع أستاذ حسين المنباوي في الفتوة سابقا.. ولكن كنت عايز متبقاش كل أدواري كوميدي وكان نفسي أكسر الحاجز ده.

وتابع: المفاجأة مكنتش فاضي ساعة ما كلموني على مسلسل جزيرة غمام إني أشارك فيه، ولكن لما قرأت المشهد دخل ذهني، من أول قراءة حسيت إن كل جملة تحتها مليون خط، وفرحت بالمشهد جدًا، عايز أمثل في اللي جاي بعيد عن الكوميدي، وبشكر حسين المنباوي على الفرصة دي.

ميار الغيطي عن مشاركتها في جزيرة غمام

وقالت ميار الغيطي: عملت دور صعيدي مرتين والمسلسل ضخم وفيه كوكبة كبيرة من النجوم وكان فيه مسئولية.

وتابعت قائلة: دي أول مرة أشتغل ورق للأستاذ عبد الرحيم كمال ومعرفش مين اختارني، وأصعب حاجة واجهتني هي إن الشخصيات كلها بتتطور دراميا وكانت شخصيتي معقدة والصراع بين الخير والشر والصعوبة الأكبر كانت تكمن في ازاي مطلعهاش أوفر وميبقاش مبالغ فيه الناس تنفر منه.

مخرج مسلسل جزيرة غمام 

وقال حسين المنباوي مخرج مسلسل جزيرة غمام: عبد الرحيم كان كاتب المسلسل مش على هيئة سيناريو ولكن على شكل رواية، ولما دخلت المشروع ده حسيته حكاية خاصة ومش دارج وحسيت إنه هيطلع منه شيء مختلف.

وأضاف: كنت خايف من الشخصيات وكان عندي إحساس إنه هيبقى بعيد عن الناس ومتتقبلوش، وده كان مخوفني لحد أول يوم عرض ولكن اتخضيت من رد فعل الجمهور وإن الناس اتبسطت، كنت عارف إنه عمل مهم وحلو ولكن مكنتش متخيل الصدى ده كله.

واختتم كلامه، قائلًا: مسلسل جزيرة غمام مختلف عن اللي قدمته في حياتي والناس كلها اللي مشاركة شاطرة أوي وحابين الشخصيات، وفي البداية مكنتش موافق على شخصية أحمد أمين وإنه طيب أوي، وأحمد أمين كان ترشيح عبد الرحيم وترشيح هائل.