سيف عبد الرحمن: قلبي بيوجعني لما بدخل ماسبيرو.. ولازم الدولة ترجع تنتج للسينما

كشف الفنان القدير سيف عبد الرحمن عن رأيه في مستقبل السينما المصرية، وما تحتاجه السينما لكي تنهض وتتقدم كعصرها الذهبي القديم، بالإضافة إلى رأيه في ماسبيرو هذه الفترة.

تحيا مصر يرصد أبرز تصريحات سيف عبد الرحمن عن السينما حاليًا

حيث قال خلال لقاءه اليوم في برنامج “أسرار النجوم”: “أنا متفائل طبعًا رغم الانحدار، وأن الموقف ما يبشرش بخير بس أنا شايف أن البلد هتقوم وهتفوق، وفيه حد هيجي هيكتشف أن القوة الناعمة بتاعتنا هي قوة اداها ربنا للمصريين بس مدهاش لأي حد تاني، فهيهتم بالفن والفنانين”.

وتابع قائلًا: “أنا مش عايز أتكلم في حكاية المعاش والشغل والتشغيل، يعني خمسة ستة هما اللي بيشتغلوا والباقي قاعدين في البيوت، أسامي وكبار وفنانين وعباقرة، فمينفعش يقعدوا في البيت او يبيعوا عربياتهم عشان عشان خاطر يتعشوا”.

سيف عبد الرحمن: لازم الدولة تنتج

كما أكد سيف عبد الرحمن أن ما تحتاجه السينما المصرية حاليًا هو تدخل إنتاج الدولة، حيث قال: “والنقابة معذورة بتدي معاش 700 جنيه يعمل ايه، أنا رأيي أن الدولة لازم ترجع تنتج تاني وهتكسب لأن الفضائيات أكتر النهاردة والعرض والطلب أكتر والناس بتحب مصر في الوطن العربي”.

وأضاف: “ليه بندبلج المسلسلات التركي والهندي مترجمة باللبناني أو بالسوري ما احنا طول عمرنا عندنا أنيسة عبيد بتعمل دوبلاج والناس بتحب لغتنا وطريقتنا، ليه مش بنعمل كدا”.

وتابع قائلًا: “القطاع الخاص مش مطلوب منه يعمل حاجات كويسة بس ينافس، لكن لما الدولة تكون هي اللي بتنتج يبقى لازم تهتم وتعمل تاني وترجع للعظمة بتاعت الإنتاج المصري والتلفزيون المصري”.

سيف عبد الرحمن: بخش ماسبيرو بحزن

ومن ناحية أخرى أعرب الفنان سيف عبد الرحمن عن حزنه من حالة ماسبيرو في الأيام الحالية، حيث قال: “النهاردة فيه في ماسبيرو مليون قناة ومحدش بيتفرج عليه ومفيش إنتاج بسبب سوء الإدارة، الله يرحمه محمود الليثي كان بيعرف يدير التلفزيون دا كله وبيعمل أعظم شيء، فينه النهاردة”.

وتابع قائلًا: “احنا ناقصنا الإدارة وأنا من رأيي لو نجيب خبير من برا يديره زي ما بنجيب خبير للكورة ما جبش ليه خبير للفن، أنا بخش ماسبيرو بحزن وقلبي بيوجعني مفيش حد، والمصريين هما هما والإمكانيات أسهل والتكنولوجيا أسهل والنهاردة لو اشتغلنا هنعمل حاجات أحسن مليون مرة من القديم”.