ياسر علي ماهر: لو الفن حرام يبقى مفيش حضارة مصرية.. وظهر مجموعة من المشايخ ميعرفوش حاجة

حل الفنان ياسر علي ماهر اليوم ضيف  برنامج الرسالة مع الإعلامي على الدهراوي على قناة الحدث اليوم، وتحدث حول حرمانية الفن وأهميته ودوره في المجتمع واستنكر تحريم بعض الشيوخ له

تحيا مصر يرصد لكم تصريحات ياسر علي ماهر في برنامج الرسالة 

تصريحات ياسر علي ماهر 

تحدث الفنان ياسر علي ماهر أن الفن لا يحتوي التمثيل فقط، قائلًا: الشيخ شلتوت كان يقدم حلقات جنة ونار بصوته الشريف لوالدي الفنان محمد علي ماهر، وقال لو أن الأزهر يعطي دكتوراه لأعطيتها لك وأصر على والدي أن يؤم المشايخ.

وتابع: الشيخ عبد الحليم محمود كان أبًا مع الفنان وليس عدو، دلوقتي أنتم تحولتم إلى أعداء لنا، وبعدين أجي أعمل حاجة دينية تقولي لأ ده ممنوع.. طب أعمل الفن اللي أنا أعرفه، تقولي لأ الفُحش أرسوا على بر، إحنا معاكم في مركب واحد، الكلمة تجمعك وتجمعني، الكلمة ليس مكانها المنبر فقط.. الكلمة موزعة علينا كلنا.

ياسر علي ماهر: إزاي بتحرموا عليا الموهبة 

واستكمل كلامه، قائلًا: إزاي ربنا أداني الموهبة عشان حد يحرمها عليا؟، ولو جيت عملت شعر يقولوا حرام.. نستوعب ده إزاي؟، ولو الفن حرام ده معناه أنه مفيش لا سينما ولا مسرح ومفيش إحسان عبد القدوس ولا طه حسين ولا كل هذا التراث ولا يوسف شاهين وعلم مصر اللي عليه الصقر، وكل بنت لابسة بلوزة عليها عصفورة، ويبقى كل البرامج مفيهاش بنات، ونهد الحضارة والأهرامات والكباش وكل الشغل الفرعوني والمتاحف والكورة، لأنها بتشغل عن ذكر الله، مع أننا لما بشوف جون بقول الله أكبر، لكن للأسف ظهر مجموعة من المشايخ لا يعرفون الفن.

وأردف: والناس اللي بتصنع الأشياء دي هتأكلها منين؟ وبالنسبة للتمثيل على وجه التحديد هضرب مثال لو أنت معاك سكينة قتلت بيها يبقى العيب في السكنية ولا فيك؟، فالفن المقياس حسنه حلال وقبيحه حرام لأن الفن من الفنون القائمة على الحق والخير والجمال.

ياسر علي ماهر: كلمة الفن حرام بتهدم الحضارة

واختتم كلامه، قائلًا: أنت عارف إيه هيحصل من كلمة الفن حرام عرفت إيه الأثر؟ كل أصحاب المهن دي لازم تأكلها، هتهدم الحضارة بالكامل، مش اللغة المصرية القديمة بالرسومات؟ ده حرام يبقى مفيش اللغة الهيروغليفية القديمة ما هم بيرسموا.