تامر حسني يوجه نصيحة للمحبطين: افتكروا ظروفي الصعبة.. وخلي عندكم خطة بديلة

وجه نجم الجيل تامر حسني نصيحة لمتابعيه المحبطين من الحياة وتحقيق أحلامهم، وضرب لهم أمثلة من حياته التي عاشها قبل الشهرة ودخوله عالم الفن، وذلك عبر حسابه الرسمي بموقع تبادل الصور والفيديوهات الشهير انستجرام 

تحيا مصر يرصد لكم نصائح تامر حسني لـ متابعيه المحبطين من الحياة 

تامر حسني عبر انستجرام 

وكتب تامر حسني: قرأت معظم التعليقات على قد ما قدرت على اخر بوست ليا اللي فوق دا، وفهمت أكتر حاجتين من تعليقاتهم عاملين احباط لمعظمكم.
١- اليأس من النجاح
٢- احباط المقربين

وأضاف: وبعضكم واصل لفقدان الأمل والشغف وبعضكم فاقد الأمل في الحياه نفسها، وهطلب طلب منكم قبل أي شيء افتكروا معاناتي في بدايتي وظروفي الصعبة من غير أب ومن غير أي فلوس و بنزل اشتغل في الشوارع من عامل بنزينه لسوبر ماركت لفاعل يعني اللي بيبنوا العمارات بطلع طوب واسمنت عشان ارجع بيتي لأمي الغلبانه بأي خمسة جنيه بالإضافه لمرتب النادي لما كنت بلعب كوره كان مرتبي ٢٢ جنيه في الشهر منهم بقى تحويشة الميه والكهربا وعمليات اخويا عشان كان عيان لفتره كبيرة.

تامر حسني لمتابعيه: خلي عندك خطة بديلة

وتابع تامر حسني:  كنت بعمل المستحيل فعلاً عشان امي  اخويا وعشان أوصل لهدفي، كان جوايا سعي دائم لطريقين الكوره والغناء و بقول دا عشان ناس كتير عايز انصحها بالخطه البديله عشان لو الحلم مجاش يكون في غيره زي ما أنا كان نفسي أبقى لاعب كوره والكوره مش ليا و الأنديه كلها مشوني رغم تفوقي.

وأردف قائلًا:  كنت بسأل نفسي ليه الابواب كلها بتتقفل في وشي اتاريها بتتقفل عشان توجهني لمسار اخر و لما آمنت بكده فهمت قدام ان ربنا كان شايلي الاحسن ليا بس ساعتها مكنتش فاهم، واللي بيسأل نفسه دلوقتي يعني أنا اكمل في حلمي ولا اشوف حلم تاني هقوله دايمًا اطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لاا بس اجتهد واتعب عشان المجهود دا ليه كرم متحوشلك في مجالك التاني وأوعى تقول تعبت عالفاضي.

تامر حسني لمتابعيه: متسمعش للمحبطين وقول يارب

وأستكمل كلامه، قائلًا:  وبالنسبة للمحبطين هيفضلوا موجودين أنت اللي بتسمعلهم و انت اللي بتسمح انك تتأثر بيهم امنع دا فورًا متبقاش السبب في أذية نفسك متتشدش غير لكل جميل و لكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك انت السبب دايمًا قول يارب و اجتهد.

واختتم كلامه، قائلًا: و افهم إن الراحه المطلقة في الجنة بس واحنا على الأرض وربنا قال انه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم اصعب و وصلوا يبقى الموضوع فينا، متبقاش أكبر عدو لنفسك، أنت السبب، خد قرار صارم فورًا في التغير والنهوض والنجاح ، والله هتوصل، متسمعش غير لقلبك وسلم قلبك للّي خلقه و توكل على الله.