للمرة الثانية.. مديحة حمدي تعلن تعافيها من كورونا: "دور انفلونزا والناس أفورت"

كشفت الفنانة مديحة حمدي عن تفاصيل تعافيها من فيروس كورونا المستجد، وذلك بعد إصابتها به للمرة الثانية 

تحيا مصر يرصد لكم تصريحات مديحة حمدي حول تعافيها من فيروس كورونا 

مديحة حمدي: "قعدت 10 أيام في الحجز وخفيت"

وقالت مديحة حمدي لـ تحيا مصر: الحمدلله خفيت من كورونا، الدور محتاج مناعة قوية وإننا نمشي على بروتوكول العلاج هو زي زي دول الإنفلونزا بس الناس اللي بتهوله وأعراضه مختلتفتش عن أعراض إصابتي الأولى.

وتابعت، قائلة: قعدت 10 أيام في الحجر والتزمت بالبروتكول اللي حطه ليا الدكتور بتاعي من أكل صحي ودخول الحمام عند الضرورة، والحمدلله خفيت وهمارس حياتي الطبيعية من بكرة وطالعة مصيف.

مديحة حمدي: "شكرًا لكل اللي سألوا عليا"

واختتمت كلامها قائلة: الدور بيبقى صعب على اللي مناعته ضعيفة أول بيعاني من أمراض صدرية، شكرًا لكل اللي سألوا عليا على إهتمامهم بيا.

ندوة مديحة حمدي في تحيا مصر 

وجدير بالذكر، أن حلت الفنانة مديحة حمدي ضيفة تحيا مصر في يناير الماضي، وكان أحدث ظهور لها بعد قرار عودتها للفن مرة أخرى بعد غياب 7 سنوات، وجاءت التصريحات كالآتي:

- سبب اعتزالي تعب زوجي رحمة الله، وكنا مخبيين على زوجي نوع المرض لحد ما توفاه الله، فقولتله اشتغلت كتير وسنين طويلة فحان الوقت إني اقعد اتفرغ لحياة اسرية واقعد معاك اكتر، ولاقيته مرحب وده واجبي كزوجة. والاعتزال استثنيت فيه المسلسلات الاذاعية الرمضانية الدينية، وفي حاجة في رمضان هتكون اجتماعية.  

- عملت امسيات دينية من انشاد والحان الدكتور أحمد الكحلاوي مداح الرسول وكانت من تأليف سراج الدين عبد القادر.

- سبب رجوعي إن عندي فراغ وزوجت اولاي وخلفوا واستقروا، وحسيت إني قطعة إكسسوار قاعدة في البيت، والتليفون بيسد الفراغات لكن بيبقى الليل طويل والنهار طويل.

- طبيعة زوجي كرجل شرطة خلاني بيتوتية شوية وليا نظام في الحياة العائلية ومدخلش بيتي غير واحد أو اتنين من الفنانين.

- ولادي وأحفادي وأهلي مبسوطين ان وقت فراغي هستغله وشايفين ان كله محاسن بشرط مجيش على صحتي.

- مؤمنة بمقولة للحفيد فرحتان فرحة عن القدوم وفرحة عند النزول لكن هما غاليين.

- السينما مش اول مرة تمر بأزمات العُري وحصل قبل كده في السبيعنات والتمانينات،بس كل بلد ليها التوب بتاعها واللبس بتاعها ده شئ وده شئ، المهم في كل ده النهايات.

- ربنا دخلني على الدين برفق لحد ماحسيت اني عايزة أتحجب 22 رمضان 1992،دخلت لزوجي وقولتله انا هتحجب قالي موافق بس مش هسمحلك تقلعيه، قولتله هكلم شيخ قالي توكلي على الله عشان ماهو حرام حرام وما هو حلال حلال اعملي الحلال وراعي بيتك ودينك وأولادك.  

- بحب إياد نصار جدًا ومنى ذكي ومنه شلبي وياسمين عبدالعزيز ومحمد فراج وأمينة خليل، اي عمل ليهم بحب اتفرج عليه.

- كنت حريصة اني اسمع في مكارم الاخلاق واقرأ فيها وعشان انا ساكنة في الهرم العمرانية فيها نساء أميات كتير مش على قدر من العلم، فكنت حابة اني اقرا كتب للغزالي وللمعاصر والخصها في نقط ولو حضرت درس لعالم من العلماء بعملهم في نقط واقولهم. وشايفة دلوقتي إن في إكتفاء بسبب التلفزيون بقى فيه برامج كتير والسوشيال ميديا، المشاهدة والاستماع بيلعبوا دور كبير.