مروة تستغيث: طليقي قطع وشي بالكتر..وكان بيدخل على بنته الحمام عريان| فيديو

«أنا أتحديت كل أهلي علشان أتجوزه، وفي الأخر لقيته مش بني أدم، وكل حاجة وحشة في الدنيا عملها، وأخرهم بيدخل على بنته الحمام عريان وهي بتستحمى بدون حياء منه وعدم مراعاة حرمة بنته» .. بتلك الكلمات التي أطلقتها مروة في لقائها مع تحيا مصر لتروي لنا مأساتها مع زوجها المدمن بمنكقة النزهة شرق القاهرة.

زوجة ترد على زوجها رضا: خد اللى عايزة ليلة الدخلة وعايز يطردني علشان ابن خالي باسني .. ومشوفتش يوم حلو معاه

رافع إيديه وبيتشاهد ..حسن اتخانق مع مراته وولع في البيت ونفسه| فيديو

حاربت أهلي و كل الدنيا عشانه 

بدأت مروة كلامها:" أنا أتجوزته وأنا عندي 13 سنة, وأهلي كانوا رافضين وقالولي لو أتجوزتيه هتبقي ولا بنتنا ولا نعرفك بس أنا كنت بحبه وأتحديت الكل علشانه, وفعلا أتجوزنا وجبنا ولد اسمه سيد عمره 17 سنة وبنت اسمها سما عندها 15 سنة, وأخواتي كلهم كملوا تعليم وأنا مكملتش عشان أخدموا هو وأولادي, رغم إن طباعه الوحشة وإدمانه للمخدرات كانت موجود من أول جوازنا". 

طالع من حبس 3 سنين 

وأضافت مروة:" قبل كده قتل واحد في مشاجرة وخد حبس 3 سنين, وأنا كنت بجري عليه أنا وعيالي ومفوتلوش ولا زيارة في السجن, ولما طلع من الحبس, بقي أصعب من الأول ومبقاش يخاف من حاجة وبعد ما كان مدمن مخدرات بس, بقي بيتاجر كمان فيها, وكل ما أقوله نشتغل شغلانة نضيفة زي إننا نبيع شاي وقهوة علي الطريق للناس, كان يقولي مش هبهدل نفسي البهدلة دي, روحي أشتغلي أنتي وعيالك". 

خاني مع كل صحابي وعلي سريري 

ومن ضمن ما حكت مروة:" أكتر من مرة حد يوقفني في الشارع وأكون لسة راجعة من الشغل و يقولي صاحبتك لسه نازلة من شقتك وكانت مع جوزك بيشربوا ومبسوطين , وأنا من قهرتي أسكت وأبقي مش عارفة أرد أقول أية, لحد ما أتعودت علي الوضع ولما بقي حد ييجي يقولي كدة أقولهم سيبوه يعمل اللي هو عايزه".

كان بيطلع صحابه علينا الشقة واحنا نايمين 

وأستكملت مروة:" كنا بنبقي نايمين أنا وعيالي الساعة 3 أو 4 الفجر وهو مش موجود, ونلاقي صحابه بيخبطوا علينا ولما نسألهم جايين تعملوا أية, يقولولنا دبدوب قالنا نستناه هنا عشان نقطع أكياس الشابو عندكم, لأن جوزي كان بيتعاطي الشابو وكان بنسباله زيه زي السجاير،وكنت بسكت علشان بخاف منه". 

كان بيجبرني علي العلاقة الزوجية قدام ولادي 

وأضافت مروة:" كان مزاجه إنه يمارس العلاقة الزوجية معايا قدام عيالي الأتنين, ولما كنت أرفض كان يضربني , وبنتي لما تعبت من الوضع خدت أخوها وراحت لجدتها عشان تهرب من اللي بتشوفه من والدها". 

كان بيدخل علي بنتي الحمام وهي بتستحمي

وتابعت مروة:" وأكتر من مرة يدخل علي بنتي في الحمام وهي بستحمى, و لما تسأله يا بابا بتعمل أيه, يقولها عادي يا حبيبتي أنا أبوكي, ولما كان يطلب من أبني ينزل يجيبله كيس باور وابني يقوله لا, كان يجبره يقلع كل هدومه وينزل في الشارع وسط الناس, وابني عنده 17 سنة ومخافش علي شكله وسط الناس".

مسكني هو وأخوه وقطع وشي بالكتر 

و قالت مروة:" بعد ما شوفت كل عمايله بدأت أخاف علي عيالي منه وقررت أخلعه, ولما عرف أني خلعته أتهجم عليا هو أخوه, وأخوه كتفني وهو قطع وشي ودراعي ومناطق حساسة كمان في جسمي بالكتر, وابني من كتر الخوف رمي نفسه من الدور الخامس عشان يهرب منه وكان هيموت, وقالي هخليكي تطلعي كمان علي التليفزيون وتتحايلي علي الناس تيجي تلحقك ومحدش هيعرف  يخلصك مني". 

حتي أهلي مرحمهمش

وأستكملت مروة :" أهلي مسلموش من أذاه, والدتي ست مسنة عندها 69 سنة, لما جت تدافع عني وهو بيتهجم عليا, قطع دراعها هي كمان بالكتر وشتمها أفظع الشتايم, وأختي شافها مرة ماشية في الشارع وكان هو سايق عربية, راح داس عليها بالعربية أترمت في الأرض وكانت هتموت". 

هددني أنه هيرمي عليا ماية نار 

وختمت مروة:" بعد ما قطع  وشي وجسمي, قالي لو مرجعتليش هرمي عليكي ماية نار وأخليكي تتشوهي ومحدش يرضي يبصلك, وهو دلوقتي هربان وممكن ينفذ كلامه في أي وقت بس أنا سايباها علي ربنا, ولو خوفي هيبقي علي حد هيبقي علي ولادي".