"شكلها الجديد مبالغ فيه".. هكذا علقت مفيدة شيحة وسهير جودة على جدل "القايمة"

أثيرت حالة من الجدل في الأيام الماضية بسبب “القايمة” وهو ما يقوم الرجل بالإمضاء عليه من ممتلكات لضمان حق زوجته قبل عقد قرانهما.

تحيا مصر يرصد في ذلك التقرير تعليق مفيدة شيحة وسهر جودة على جدل “القايمة”

خرج عدد كبير من رواد السوشيال ميديا يتناولون أنباء عن إلغاء القايمة، الأمر الذي يتطلب عليه أن يقوم بتجهيز منزله دون مساعدة وتدخل من أهل زوجته، ورأى البعض أن هذا الأمر في صالح النساء والبعض الأخر وجدها غير ضامنة لحقوق المرأة.

سهير جودة: مع إن الست تضمن حقوقها بس من غير مبالغات

وعلقت الإعلامية سهير جودة على هذا الأمر خلال برنامجها “الستات” المذاع على قناة النهار، فقالت: “أنا مع إن الناس تضمن حقوقها لكن من غير مبالغات، ومن غير استخدام القايمة كسيف على الزوج، الجواز مش فرد، الجواز عيلة ولازم أشوف أخلاق الزوج وأمه وأبوه، ولو الولد له كبير محترم من عيلته لا داعي للقلق، لإن الحقوق المادية أسهل شيء، وإنه يحترم بنتي ويحافظ عليها أهم بكتير جدا”.

وأكدت: "في ناس كتير لا تعترف بالقايمة، لإن البنت لو مش مبسوطة مفيش أي حاجة تعوضها، لكن بما إننا لا نراهن دايما على الأخلاق لازم الستات تعمل كده".

مفيدة شيحة: في عدم التزام في الزواج ومحدش متخيل حجم المسؤولية

بينما قالت مفيدة شيحة، معربة عن غضبها من الشكل الجديد لـ “القايمة": “مع احترامي لكل الشباب، في عدم التزام غير طبيعي في الزواج، والولاد مش متخيلين حجم المسؤولية وإن في شريكة حياة، أنا متفقة مع إن تكاليف الزواج زادت بطريقة فيها نوع من الجنون، لكن فكرة إلغاء القايمة عشان تكاليف الزواج أنا مش ضدها”.

مفيدة شيحة: القايمة بقت مبالغ فيها

واختتمت مفيدة شيحة حديثها، فقالت: “القايمة لما بدأت كانت جزء من حفظ حقوق المرأة، وعلى أيام أبويا وأمي لما إتجوزوا عملوا قايمة بالأشياء اللي اشتروها، لكن حاليا بنتكلم عن شكل جديد من القايمة، أجيب ورقة بيضا وأمضي الراجل على 300 أو 600 ألف جنيه، ده مبالغ فيه”.