زوجة بمحكمة الأسرة: جوزي سرق ورثي من أبويا وخلع بره البلد

«جوزي ضحك عليا وخد كل فلوسي وهرب ورمالي 4 عيال في رقبتي وأنا مش حيلتي حاجة».. تلك كلمات مريم وهى تروي مأساتها لـ تحيا مصر أثناء تواجدها في محكمة الأسرة.

زوجة في محكمة الأسرة: جوزي حرامي وبيحب الستات العجوزة

زوج في محكمة الأسرة: مراتي خلعتني واستولت على شقتي وشقى عمرى| فيديو

فقالت مريم: "أنا عندي 4 أطفال وأتجوزت من سنة 2004، ورفعت عليه قضية خلع في 2021، ودعوى نفقة صغار ولحد دلوقتي، لم أخذ حكم في أي قضية، حتى حكم دعوى النفقة مخدتهاش لسه".

شريك عمري

وتضيف مريم: "جوزي ده شريك عمري ونصيبي من ربنا وأبو الأولاد، وأنا عملتله توكيله بكل فلوسي وأملاكي، لإننا واحد وهو بدأ يدير فلوسي وفلوسه، وهو كان شغال في العقارات، وشخص هادي وكريم عليا وعلى أولادي".

وتستكمل مريم: "أنا كنت مطمئنة لجوزي ومدياه الأمان، وعمري ما شكيت لحظة فيه  إنه يخوني، بس للأسف جوزي شركته فلست وخسر كل حاجه، وأنا سلفته مبلغ صغير بناء على طلبي، فهو كان رافض في البداية، ولكن بعد فترة وافق على الطلب، وبدأ يغير عمله لعمل آخر ولكنه فشل أيضا، وبعد كده أنا زهقت من الموافقة على إقراضه فلوس".

افتتاح مغسلة

وبصدمة تقول مريم:" فوجئت بمكالمة صديق جوزي وبيقولي أنتى فين جوزك عامل احتفال وأنتي مش حاضره الاحتفال ليه، وأنا أتصدمت وقتها من الكلام، وفهمت أن جوزي افتتح مغسلة وبيوزع كانزات مواد غازية على الناس ببلاش حلاوة الافتتاح، ومش عارفه هو جاب فلوس المغسلة منين، وأنا وقتها مشكتيش فيه إنه ياخد فلوسي".

وتكمل مريم:"لما الافتتاح انتهى، رجع جوزي وبسأله عن افتتاح المغسلة، وإزاى ميقوليش وأنا أعرف من حد من بره، لقيت ملامح وشه أتغيرت وقالى أنا استلفت من واحد صاحبي، واحنا شركاء في المغسلة، ولما طلبت تبرير منه لعدم وجودي، رد ببرود عليا بإنه كان احتفال بسيط ومكنش عاوز يتعبني وإني كنت هرفض أنه يستلف من حد فلوس" .

سرق دهبي

وتضيف مريم: "انتهى الموضوع وروحت زورت والدتي بالأولاد، رجعت ملقتش دهبي خالص ولا جوزي، وفضلت أسأل عليه، وتليفونه مقفول، مفيش خبر عنه ولا كأنه موجود، واستمرت الأيام وكنت بسأل سؤال الدهب أتسرق ولا حصل ايه، وسألت في المغسلة، لقيته كان مأجر المغسلة والإيجار انتهى".

وتسترسل مريم: "بدأت أسأل عليه في كل مكان وهو غير موجود، واضطريت إلى سحب فلوس من البنك من رصيدي اللى يبلغ ربع مليون جنيه، وده من ورثته من والدي، وفوجئت بالحساب في البنك صفر، أنا اتصدمت من موقف البنك وطلع جوزي سحب الحساب وسافر خارج البلاد من تاريخ سحب الرصيد".

قضية خلع

وتختتم مريم: "أنا فضلت سنة معرفش عنه أي حاجه وقررت أرفع قضية بالخلع علشان أتخلص منه ورفعت قضية نفقة، ولحد دلوقتي مخدتش حكم في أى قضية من القضايا اللى رفعتها ضده".