"خايف أهاجم تامر حسني ميشغلنيش معاه تاني واتظلمت كتير في الوسط".. تصريحات رضا حامد بأول ظهور له بعد غياب

حل الفنان رضا حامد ضيف على برنامج “كلام الناس” الذي تقدمه الإعلامية ياسمين عز على قناة mbc مصر وذلك في حلقة اليوم السبت، ليتحدث خلاله عن سبب اختفائه بشكل مفاجئ عن الساحة الفنية، ويرصد تحيا مصر في ذلك الإطار أبرز تصريحات الفنان خلال البرنامج.

تصريحات رضا حامد لـ ياسمين عز

• مش عارف سبب إختفائي بس شهرتي وتاريخي الفني بيشفعلي إنهم يسألوا عني أنا فين.
• كل الفنانين عندهم إصحاب بيساندوهم بس أنا صحابي مش راضيين يشغلوني.
• ابني قلقان عليا حاسس ان أبوه موهوب ومش بيشتغل فدخل كلم عبد الرحيم كمال وهو رد عليه وقاله دا نجم كبير وحاجة محترمة وهيكون معانا.
• ما سألت ابني ليه بيدورلي على شغل قالي عشان انت مقصر في حق نفسك.
• مقدرش أهاجم تامر حسني عشان ممكن ميشغلنيش معاه تاني.
• تامر حسني اشتغل كتير ومقاليش تعالى معايا في أي عمل مع إنه عارف اني موهوب ودمي خفيف زيه.
• زعلان من حمادة هلال لأنه مش فاكر رضا حامد مع إنه من أكتر الناس اللي حبيت الشغل معاهم.
• اتظلمت كتير في الوسط الفني ولو شيطان عرض عليا عمل هوافق.
• عادل إمام قالي إنت موهوب ودا إشادة هفضل شايلهاله على راسي.
• أنا راضي باللي أنا فيه الحمدلله وعارف إنه كله بستر ربنا.
• ياسمين عبد العزيز ودنيا سمير غانم موهبين بس ساعات الكوميديا بتوه منهم شوية.
• مقولتش حاجة غلط فى حق الأستاذ عادل إمام، لكن حدث موقف، وأتفهم بطريقة خاطئة.
• عادل إمام تاريخ كبير جدا، ومش هنسى أي موقف ليها، واتعلمنا منه التمثيل والكوميديا، وربنا يعفو عنه.

معلومات عن رضا حامد

جدير بالذكر، أن الفنان رضا حامد كان تغيب عن الوسط الفني منذ فترة طويلة، اذ كان أخر عمل قدمه مسرحية بعنوان “الزهر لما يلعب” في عام 2020 أمام الفنان سمير غانم، وكان قد بدأ رضا حماد حياته الفنية في بداية الثمانينيات بأدوار صغيرة في بعض الأعمال السينمائية والتليفزيونية والمسرحية مثل فيلم وكيل النائب العام ومسلسل دهب قشرة ومسرحية طب ليه، وسرعان ما بدأت شهرته تزداد بعد أن استخدم طريقة معينة في الكلام أدت إلى تميزه.