رنا أبو السعود: "شيرين انهارت يوم وفاة بابا وباست رجله وقالت متسبنيش"

حلت رنا نجلة الموسيقار حسن أبو السعود ضيفة بموقع تحيا مصر، لتتحدث عن الأزمة التي أثارتها شيرين عبد الوهاب بعد تنمرها على الراحل أبو السعود خلال مداخلة هاتفية لها ببرنامج "كلمة أخيرة" مع الإعلامية لميس الحديدي.

تحيا مصر يرصد لكم تصريحات نجلة حسن أبو السعود بعد تنمر شيرين عبد الوهاب عليه

رنا أبو السعود: "من غير ما تعتذر مسامحاها"

وقالت رنا أبو السعود: أنا استغربت شيرين لأنها كانت قريبة من أبويا جدًا ويوم موته كانت بتبوس رجله وهي منهارة من العياط وبتقوله متسبنيش يا حسن، وهي من غير ما تعتذر انا مسامحاها، لازم نستحمل بعض، ولو هي شتمتني انا شخصيًا، يبقى الله يسامحك ويهديكي ويصلح حالك.

رنا أبو السعود تعفو عن شيرين عبد الوهاب 

وأردفت داعمة لشيرين: كفاية هجوم عليها مش هبقى أنا والسوشيال ميديا عليها، وأبويا لو كان عايش كان كلمها وهزر معاها وشتمها شتيمة خفيفة، وهو اللي معلمنا إن في حساب وقد ايه حصل مشاكل مع ناس وهو مردش فيها خالص.
رنا أبو السعود: "أقرب صاحب لبابا بواب عمارتنا"

وتابعت رنا متحدثة عن رد فعل حسن أبو السعود على تنمر شيرين لو كان على قيد الحياة، قائلة: بابا روح الفكاهه عنده مع جميع خلق الله، واقرب واحد ليه بواب العمارة، وشيرين انا دخلت مرة لاقيت واحدة طالعه بالبيجامة وكانت شيرين وبابا محتضنها، جاتلنا البيت عشان بابا يسمع صوتها وقالها هتبقي نجمة، وكان سبب لظهورها.

واستكملت نجلة حسن أبو السعود كلامها: جتلنا البيت عشان بابا يكتشفها، وهو اللي مكتشف جورج وسوف وبهاء سلطان وراغب علامة، ورحب بيها واتأثر بيها جدًا، والبداية كانت من عندنا في البيت، وبابا اداها مفتاح شقة اسكندرية في شهر العسل عشان تقعد هناك.
رنا أبو السعود توجه رسالة لشيرين عبد الوهاب 

واختتمت رنا حديثها موجهه رساله لشيرين عبد الوهاب تنصحها بعدم ظهورها في أي برامج مرة أخرى لأنها لا تمتلك القدرة على تنظيم الكلام، وأن تركز في فنها أكثر من اللقاءات التي تظهر فيها، قائلة: كفاية وركزي في شغلك ومتطلعيش في برامج تاني عشان هتدخلي في مشاكل مش هتطلعي منها، ومش هتلاقي دايمًا زي عائلة حسن ابو السعود تسامحك، وركزي في الفن، عشان فن إجادة الكلام مش عندك وده مش عيب في فنانين كبار مش بيطلعوا في اي لقاءات خالص.