خلعته بكرامتي..ميرفت في محكمة الأسرة: جوزي عايش معانا في الشقة غريب

«والله العظيم شقتنا مش كبيرة أووى علشان جوزى ميسألش عليا أنا والعيال واحنا عايشين في نفس الشقة».. بتلك الكلمات تروي ميرفت مآساتها لـ تحيا مصر مع زوجها حين ألتقاها داخل محكمة الأسرة.

تقول ميرفت صاحبة الـ ٣٩ عاما:" أنا اتجوزت من ١٩ سنة، وجوزى شغال نجار، وبعد كده اشتري تاكسي، اشتغل عليه، واحنا قبل الجواز كنا جيران في نفس الشارع، ولما اتجوزته انتقلت لعش الزوجية الخاص بنا، وأنجبنا ولد وبنت، عمر الولد ١٨ سنة والبنت ١٣ سنة دلوقتي".

مريضة ورفض أروح المستشفى

وتضيف ميرفت:" جوزى كان كتير الخصام، مرة فضلت ١٥ يوم تعبانة في السرير وهو بيرجع متأخر ومبيسألش عليا ويدخل على حجرته يقعد فيها ولا كأنى مراته وتعبانه وهو نازل الصبح حتى ميقوليش صباح الخير، فجوزى كان جاف ومعندهوش أى حنية ورمانسية".

وتستكمل:" أنا فعلا اتخنقت حتى ابنى زعق لوالده بسببي، لما كنت مريضة في السرير ومش قادرة اقوم اعمل حاجة البيت ولا اعمل أى حاجة، فابنى بيكلم أبوه وبيقوله يا بابا لازم تروح ماما المستشفي هى سخنه راح رد وقاله إديها حقنة ولا أى حاجه وخلاص أنا مش فاضيلكم وفضل ماسك الموبايل راح ابنى مسك موبايل أبوه كسره علشان يركز معاه وفي اللى بيقوله ومن وقتها وجوزى مبيكلمش ابنى الكبير خالص" .

خلعته ورفعت دعوى نفقة

وتسترسل ميرفت:" هو مش بيسأل علينا واحنا عايشين في نفس البيت ولو واحد حصله حاجه مش هيفرق معاه علشان كده أنا اسيبه واخلعه بكرامتي بدل ما هو هجرنا كده غصب عنا، ولا بيكلم العيال وكإننا موجودين في حياته، وتراكمات سنين والواحد بيكون مستحمل علشان العيال، وعلشان الدنيا تمشي بس الواحد بيجى عليه وقت بيكون طاقتة خلصت، علشان كده رفعت قضية خلع على جوزى وحاليا ماشية في إجراءات النفقة للعيال".

مش بيسأل علينا

وتختتم ميرفت باكية:" احنا شقتنا مش كبيرة أوى دول حجرتين وصالة، وهو مكنش بيسأل لا عليا ولا على العيال، وبعد الخلع نفس الكلام جوزى بيقابلنا أنا والعيال في الشارع ومش بيسأل حتى على العيال رغم أنه شايفنا".