خاص| الناقد أحمد سعد الدين عن تامر حسني: إيرادات الدول العربية متجبش الأرقام اللي بيقولها..وفيلم بحبك هيتنسي كمان سنة

أثار النجم تامر حسني جدلًا واسعًا في الفترة الأخيرة بسبب تصريحاته عن إيرادات فيلمه الجديد “بحبك”، وأخد تامر ينشر من حين لآخر الأرقام التي حققها الفيلم في الوطن العربي وأمريكا واصفًا إياها بالقياسية، وذلك عرضه لهجوم شديد من قبل عدد من الجمهور.

تحيا مصر يرصد رأي الناقد أحمد سعد الدين حول إيرادات “بحبك”

وفي ذلك السياق كشف الناقد الفني أحمد سعد الدين في تصريحات خاصة لموقع تحيا مصر عن رأيه حول إيرادات فيلم “بحبك” التي يعلنها تامر حسني كل فترة، وقال: “حتى الآن معندناش مصدر نقدر نستند عليه في الإيرادات، بمعنى هو دلوقتي بيتكلم عن الإيرادات في مصر والوطن العربي، احنا في مصر عارفين الموضوع أن الفيلم جاب لغاية دلوقتي حاجة وعشرين مليون وبردو مقدرش أقول إن دا مية في المية ولكنه إيراد تقريبي”.

وتابع: “أما إيرادات الدول العربية متجبش الأرقام الكبيرة جدًا جدًا اللي هو بيقولها، طيب فين المصدر بتاعه، الأرقام دي موثقة منين، ودا اللي هيخلي جمهور بعض الدول العربية تقول الفيلم مش ماشي، إذن كل الإيرادات دي لا تستند إلى مصدر صحيح”.

تامر حسني في مواجهة الجمهور

تعرض تامر حسني للكثير من الانتقادات بسبب نشره لقائمة إيرادات فيلم “بحبك” وهي تضم دولة اليمن والجزائر، وأوضح عدد من الجمهور اليمني أنه لا توجد سينمات في اليمن، كما أشار عدد من الجمهور الجزائري لأن الفيلم غير معروض عندهم.

وأوضح الناقد أحمد سعد الدين رأيه في هذا الموضوع قائلًا: “أما بالنسبة لموضوع الجمهور اليمني فالله أعلم ممكن ميكونش الفيلم واكل أوي هناك أو بيكون جنبه أفلام تانية فالناس تدخل الأفلام التانية وهكذا”.

رأي سعد الدين في تامر حسني كمخرج

وعن رأي الناقد الفني أحمد سعد الدين في تجربة تامر الإخراجية قال: “تامر أساسًا مطرب ومطرب ممتاز، وكممثل مقدرش أقول عنه ممتاز، يعني مش هقارن تامر بكريم عبد العزيز وأحمد السقا وأحمد عز دول محترفين تمثيل لأنها شغلانتهم، وبالمثل لو هما غنوا مقدرش أقارنهم بتامر”.

وأضاف: “لكن هو دخل مجال جديد اللي هو الإخراج، هل دخله على حق ولا عشان هو المنتج وهو البطل وهو كل حاجة، هو بيحب يفرد عضلاته شوية ويقول بعمل وبعمل، والتجربة دي تحديدًا ممكن تنجح ماديًا في الوقت الحالي لكن على المستوى البعيد الفيلم هيتنسي لان مقاييسه الفنية مش قوية ودا الطبيعي”.