هنا الزاهد: تامر حسني أول واحد قدمني للدراما.. واتصدمت من شطارته كمخرج

كشفت الفنانة الشابة هنا الزاهد عن سعادتها بردود أفعال الجمهور على شخصيتها في فيلم “بحبك”، وذلك خلال مداخلة هاتفية لها في برنامج “كلاكيت” الذي تقدمه المذيعة لينا الطهطاوي، ويذاع على محطة راديو “نجوم إف إم”.

تحيا مصر يرصد تفاصيل شخصية هنا الزاهد في فيلم بحبك

وأعربت هنا عن سعادتها بردود الأفعال قائلة: “اتخضيت من ردود أفعال الجمهور على دوري في فيلم بحبك، لأن أنا عمري في حياتي ما اتبعتلي عياط الجمهور جوا السينما تأثرًا بمشاهدي، ودي حاجة كبيرة أوي بالنسبالي وفخورة بأني كنت جزء من الفيلم دا”.

تامر حسني وبدايات هنا الزاهد

كما أكدت هنا على أن أول ظهور لها في الدراما كان بفضل تامر حسني، حيث قالت: “أنا لو اتكلمت على تامر هقعد أتكلم لحد بكرا، أنا من الفانز بتوعه من زمان وهو عارف كدا والناس عارفة كدا، وكان صاحب الفضل عليا من بدايتي خالص يعني أول حاجة مثلتها كانت مع تامر يعني هو اللي قدمني في الدراما في مسلسل فرق توقيت سنة 2014 وساعتها عمري ما كنت بفكر أني أمثل”.

وأضافت: “ومن ساعتها كان وشه حلو عليا ومن بعدها قعدت أعمل مسلسلات لغاية سنة 2020 كانت أول بطولة ليا وهو كان أول واحد يباركلي على المسلسل دا، وأي عمل حلو بعمله كان يكلمني ويقولي أنا فخور بيكي أوي، فهو صاحب فضل عليا بعد ربنا”.

تامر حسني كمخرج من وجهة نظر هنا الزاهد

وعن أول تجربة إخراجية لتامر حسني في السينما قالت هنا: “تامر حسني كمخرج كنت مصدومة من شطارته، مكنش بينام قبل التصوير، كان بيقعد يألف وكان مهتم بكل التفاصيل من حيث الأداء، وكان حريص أن شكلي يبقى مختلف وأبان أكبر من سني، وكان بينام في الدوبلاج وجايب مرتبة بينام عليها عشان يخلص شغل في الاستديو”. 

وأضافت في حديثها عن تامر: “تامر حسني قمة في الاخلاق والذوق وبيجبر بخاطر الناس جدًا وكل الناس اللي بتشتغل معاه بيعشقوه”.

تحضير هنا الزاهد لشخصية حبيبة

وكشفت هنا عن طقوسها في التحضير لشخصيتها في فيلم بحبك قائلة: “أنا بحب دايمًا اقفل على نفسي قبل التصوير وبقعد اذاكر كويس جدًا جدًا وبشتغل على الشخصية أكتر، والبروفات اللي كنت بعملها بردو قبل التصوير مع تامر، وقعدنا نوصل لإيه الصورة اللي احنا شايفين فيها حبيبة”.