أنا مش طرطور.. زوج بمحكمة الأسرة: مراتي عايزه تتحكم فيا .. ونفسي أشوف ولادي

"مراتي عاوزاني أكون طرطور ومتحكمش في البيت وأعمل اللى هى عاوزاه بس، وأنا كل همي ولادي نفسي أشوفهم".. تلك كلمات الزوج رامي وهو يحكى معاناته ومأساتها مع زوجته، تحيا مصر إلتقاه ليرصد تفاصيل تلك القصة.

تفاصيل القصة

قال رامي البالغ من  العمر 35 سنة:" أنا أتجوزت وعمري 28 سنة وبشتغل مهندس، وطليقتي تزوجتها وعمرها 23 سنة، وأنجبنا ولد وبنت أنا متعجب من مراتي بعد عشرة ٧ سنين، مراتي ذهبت لمحكمة الأسرة ورفعت عليا دعوى نفقة وطلاق ضرر ومفيش أسباب تخليها تعمل كده".

مراتي كانت ماشية وراء أمها

ويضيف رامي: "مشكلة مراتي أنها كانت ماشية ورا  أمها اللى مسيطره عليها سيطرة كاملة، وجعلتها ترفع قضية وتعمل محضر علشان تعرف تذلني كويس، وذلك بسبب أن بيت مراتي الست هى اللى مسيطرة مش الراجل، لإن للأسف والدها دلدول، ومراتي دخلتني السجن وسرقت فلوسي والذهب، وخدوا مني فلوس الجمعية، وحررت محضر ضدي بسرقة الذهب والقايمة، ورفعتها في محكمة جنح وخسرتها، فهترفع تاني في محكمة الأسرة ولسه منتظر حقي من ربنا".

كل المشاكل تهون علشان عيالي

ويستكمل رامي: "أنا بعد السنين دى كلها ووثقت في مراتي وأم عيالي خدت كل حاجه بدون أى مجهود منها ورفعت عليا قضية وهتحبسني وكل ده ايه بسببه، نفسي نرجع ونتصالح تاني وحتى أنا مستعد أنسي كل المشاكل دى علشان خاطر العيال بس".

المحكمة حكمت بأقل ما كنت هأعطيها

ويتعجب الزوج من زوجته:" أنا كنت عاوز عيالي بس، أخبرتها بإنها تيجى تأخذ كل حاجه من عفش وذهب  وهأصرف على عيالي أكتر ما المحكمة هتحكم وتعطيها، وهى رفعت قضية بعد ما خدت كل حاجه ، وصرفت على القضية والمحامين ودفعوا مصاريف وشهود عيان  وفي الأخر المحكمة حكمت ليها بأقل من اللى كنا متفقين عليه بكتير".

بلاش ولادنا ندخلهم المصايب دي

ويضيف الزوج: "أنا قولت بلاش ندخل أولادنا في المصايب دى واتخناقت مع والدتها، فذهبت مراتي وقتها لقسم البوليس لعمل محضر سرقة الذهب والقايمة، وهى أصلا واخده كل الحاجات دى ورفعت عليا طلاق ضرر وتبديد قايمة وحسبي الله ونعم الوكيل فيها ".

قانون الرؤية لا يصلح لتربية ابني

ويطلب رامي: "أنا نفسي أشوف ولادى ويعيشوا معايا ، ولكن  بنظام قانون الرؤية 3 ساعات في الأسبوع في نادى، لن أستطيع أربيهم تربية جيدة".