موت وخراب ديار.. عائلة المجري تعتدى على أسرة كاملة بالطالبية .. وتقتل أب لـ ٦ "عيال"

في بث مباشر لـ تحيا مصر، التقي خلاله بأسرة تم الاعتداء عليها بالضرب على يد عائلة سيد المجري بمنطقة الطالبية بفيصل، ويرصد تحيا مصر تفاصيل تلك الواقعة.

وتقول ابنة شقيق المتوفي : "عائلة سيد المجري دخلت علينا البيت ونزلوا بالشومة على دماغ عمي وطعنوه أكثر من طعنه في بطنه وأيده ورقبته حتى قتله، وتم نقله إلى المستشفي ثم إلى المشرحة".

تفاصيل القصة

وتضيف: "عمى اللى اتوفي ده عنده ست عيال، وأكبر ولد عنده 14 سنة، وعياله اتيتموا وهما لسه أطفال، وعائلة سيد المجري لما دخلت بالشومة وضربوا سيدات ورجال ولم يرحموا أحد، حتى الأطفال تم ضربهم، وعائلة سيد المجري عائلة محدش يقدر عليها، واللى ضربونا هما مؤمن وسيف وسيد وصبري، وبسببهم أخويا عنده كسر في الجمجمة وأبويا تم فتح دماغه وهما كسروا لينا أبواب الشقة و رجالتنا اتجرت على الأرض".

فيديو كامل بالجريمة وهو في النيابة

وتسترسل: "اتقبض فقط على ياسر ومؤمن والباقي لم يتم القبض عليه وأحنا ولادنا كلهم في مستشفي الهرم في العناية المركزة وحررنا محضر والضباط أخبرونا أنتوا كان المفروض تموتوا والناس صورت اللى حصل وأتسجل في المحضر وهيتعرض في النيابة، اللى يثبت كلامنا".

القصاص

وطالبت ابنة شقيق المتوفي: "أحنا بنطلب القصاص والإعدام لقاتل عمى، والقبض على عائلة سيد المجري كلها، لإنهم أشخاص بلطجية ودائما ما يقومون بالاعتداء على الناس ولا يستطيع أحد معاقبتهم لقوتهم في المنطقة".

زوجي ضاع مني

وتقول زوجة المجني عليه: "زوجى ضاع منى وأنا عندي ست عيال، هو أغلى حاجه في دنيتي، وأكبر عيالي عنده 14 سنة، هأصرف عليهم منين، وهو المصدر الأول والأخير في الإنفاق على الأولاد".

موت وخراب ديار.. عائلة المجري تعتدى على أسرة كاملة بالطالبية .. وتقتل أب لـ ٦ "عيال"

وتبكي زوجة المتوفي: "أنا مريضة سكر وهو اللى كان بيصرف عليا وعلى عياله وعمره ما اشتكي، وعائلة سيد المجري ضربونا كلنا بدون رحمة ولا شفقة ومحدش هيقدر يعملهم حاجه".

وتضيف إحدى الجيران: "عائلة سيد المجرى عائلة مشهورة بضرب الناس والاعتداء عليهم بشارع الجامع بالمنطقة الطالبية في فصيل ولا يردعهم أحد".