قولتله فرقتك كوسة.. زوجة بمحكمة الأسرة: جوزي أهلاوي متعصب وبيكهرب البيت لما يتهزم

بهتافات عالية وأصوات تهز الأرجاء، وارتداء الزي الرسمي للفريق المفضل ومتابعة سجل المباريات ومراقبة الأحداث والنتائج عن بعد، أو من خلال شاشة التليفزيون أو من مقهى، لمعرفة الفائز ليعلو صوت الشخص عاليا، أو للخسارة لرجوع للبيت وتفريغ طاقة الغضب في أسرة كأنهم هما السبب في الخسارة، ويتحول الوضع من متعة كروية إلى شجار عائلي وسط الأسرة الواحدة يدافع كل واحد منهم عن فريقه المفضل، وهنا في قصتنا زوجة زمالكاوية وزوج أهلاوي بسبب نتيجة مباراة بين الأهلي والزمالك قام بتطليقها، لترد هى برفع قضايا أسرة، ألتقى تحيا مصر بالزوجة لتروي لنا تفاصيل قصتها مع زوجها الأهلاوي.

تفاصيل القصة

وتقول  الزوجة التى تبلغ من العمر 33 عامأ:" أنا متزوجة منذ 10 سنين وعندي طفلين، وأكبر طفل عمره 10 سنوات والأخر 7 سنوات، جوزى موظف رسيفر، وهو شخص عصبي إلى أقصى درجة، ويمكن أن يقتل أحد وقت العصبية، ومشجع أهلاوي متعصب جدا".

رد فعل جوزي لما الأهلى يخسر

وتضيف: "جوزي لما بيعرف أن فيه مباراة بين الأهلى وأى فريق آخر، بينزل يتفرج على الماتش على القهوة ويقعد قبل الماتش يجهزلحضور المباراة، وفعلا الوقت اللى بيكون فيه ماتش بين الأهلى وفرق آخرى، بيبقى يوم مطلعتلوش شمس ويوم مش عادى كله غضب ونرفزة بدون سبب قبل الماتش وشد أعصاب".

زوجي بيحلل المأتش ولا كأنه محلل كروي

وتستكمل الزوجة: "أنا بخاف جدا من اليوم اللى فيه ماتش للأهلى، بيقعد يكسر ويتخانق معايا ويحلل في الماتش ولا كأنه خبير في المجال الكروي ويتكلم عن ماتش قبل لعبه ويحلل دور كل لاعب وإزاى هيجى الجون، ويسب ويشتم في تشكيلة الفريق إذا كانت لا تعجبه وفى حكم المباراة لو حسب حاجة غلط على الأهلي".

حالة من الغضب عند خسارة نادي الأهلي

وتضيف الزوجة: "أنا بشجع الزمالك وبحب الفريق الأبيض جدا، وده دايما نقطة خلافتنا والخناقات اللى بتحصل، وفي كل مرة، وجوزي كان بيتابع لسوء حظى الماتش في البيت ووقتها خسر فريق الأهلى، وكانت الكارثة الكبرى وتحول كل شئ لضباب وتحولت لديه حالة من الغضب والحزن داخل الشقة".

نادي الأهلى فريق كوسة

وتتذكر الزوجة:"أنا روحت اقلل من حزنه واضحك معه واكلمه متقلقش هيفوز المرة الجاية، رد عليا قائلا أنا عارف إنك فرحانه فيا علشان خسرنا وده هدفك، إنتى بتصلى وبتدعى إن فريق الأهلى يخسر، فاستفزني بكلامه ورديت قولت انتوا فريق كوسة اصلا وبتكسبوا بالحظ ولولا الحظ مكنتوش فوزتوا ولا مرة".

زوجي هيتحبس ..ونادي الأهلى السبب

وتتعجب الزوجة من رد فعل زوجها وتقول: "جوزى كلامى استفزه وراح مطلقني وقالى روحى عند بيت أمك علشان تعرفى تتكلمى كويس عن فريق الأهلى اللى هو يضرب الزمالك بالجذمة، وروحت رفعت دعوى نفقة علشان الأولاد ورفعت دعوى تمكين علشان أخذ الشقة وإن شاء الله هيتحبس ويبقى يورينى الأهلى هيفيدوا في ايه بعد كده".