أخويا كسر جسمي علشان ثمرة أناناس .. الحاجة نادية تروي تفاصيل أكل شقيقها لورثها | فيديو

في بث مباشر مع تحيا مصر، السيدة نادية الذى قام اخوها بالتعدي عليها وضربها بسبب اكلها ثمرة أناناس، لتروي لنا تفاصيل تلك الواقعة المؤسفة.

تفاصيل القصة

وقالت الحاجة نادية:" أنا عندى 10قراريط أرض ورثي من أبويا، وأخويا آجر منى الأرض مقابل مبلغ كل شهر، وهو مدفعش حاجه، لغاية ما قالى تعالى يوم الجمعة وقت صلاة الجمعة في الغيط وهديكي حقك، وأنا مستنياها في الأرض أكلت أناناسية لإني مريضة سكر".

ضربني بسبب أناناسية

وتكمل نادية البالغة من العمر ٥٣ عاما :"دخل أخويا عليا وقت صلاة الجمعة وأنا في الغيط، وأخبرته أنى أكلت أناناسية وبعد كده رد " طعمها كان حلو صح" ونزل بالنبوت على جسمي، وفضلت اطلب من أخويا الرحمة وأقوله ارحمني مش قادرة وفضل يضرب على جسمي كله وكلم مراته وقالها هاتي عشر ستات وطبنجة وتعالى على الغيط، وفي نفس الوقت أخويا وهو بيتكلم وقع في الترعة و ظهر صاحب توكتوك روحت ركبت معها وأنا جسمي كله متكسر من آثر الضرب".

محضر ضد أخويا

وتضيف الحاجة نادية:"حررت محضر في نفس اليوم الواقعة ضد أخويا، وانتقل لمحكمة الجنح، وأخويا قالى لما عرف، إنه هيتحبس هاقتلك بطبنجة، وأخويا بيستقوي ولا كأنه خايف من حد، وسارق حقي وحق أخواتي الستة، واحنا ٦ بنات الكبار وثلاث ولاد أصغر مننا، وأبونا قبل ما يموت كتب لكل واحده فينا عشر قراريط أرض وأخويا نصب على أخواتي وأخذ أرضهم بالغصب واخويا فهمني أنه آجر الأرض مني، ولكن الحقيقة هو اشتري مني، فالعقد اللى مضاني عليه كده، وأنا كنت معرفش، وهو لم يعطنى أي فلوس مقابل الأرض، وكان دائما يقول اصبري".

أمنية الحاجة نادية

وطالبت الحاجه نادية قائلة : "أنا زوجي ووالدي متوفي وأولادي فيه صغيرين ومتجوزين وسيبني، وأنا ست وحيدة وأخويا قدر عليا أنا وأخواتي،وخايفة منه وبتمني أنه يتعاقب ويقولى أنا ارحمني زى ما هو مرحمنيش، وأخويا مكنش سند ليا ولا عمره كان كده بمعني الكلمة".

ويقول محامي الحاجة نادية،أن مكتبه كله واقف مع الحاجة نادية ومتنازل عن أتعاب حتى تأخذ الحاجه نادية حقها من اخوها.