إلهام شاهين لـ تحيا مصر: "داعش كل تفكيرهم في الجنس وشرب الخمرة وكل اللي ملوش مهنة بيبقى إرهابي"

دافعت إلهام شاهين عن الهجوم الشرس الذي يواجه مسلسل بطلوع الروح المذاع ضمن الموسم الرمضاني هذا العام على قناة mbc مصر، مشيرة إلى أن العمل يستهدف هؤلاء الأشخاص الذين يعتقدون أن داعش الاسلام.

تحيا مصر يرصد في ذلك التقرير تصريحات إلهام شاهين عن مسلسل بطلوع الروح

قالت إلهام شاهين في تصريحات خاصة لـ موقع تحيا مصر: “إحنا عاملين مسلسل بطلوع الروح مخصوص للعقول  اللي فاهمة ان داعش يعني الاسلام، فمقصود انهم يفهموا من خلال المسلسل ان داعش مش هو الاسلام الحقيقي، بدليل انهم عندهم خيانة وتحرش بيتميزوا بالعنف وكل تفكيرهم بالجنس وبيشربوا خمرة، يعني هما مش مقتنعين باللي بيعملوه دينيا”.

إلهام شاهين: داعش لا يمت للاسلام بصلة.. وكل من ليس له مهنة بيبقى إرهابي

وتابعت: “داعش مش اسلام خالص، ولا يمت له بصلة، دول ناس من بلاد أخرى مالهم بسوريا وأرض وحكومة سوريا واللي بيحصل فيها، عشان ناس تروح تشتغل في دولة اخرى دي ناس مرتزقة، كل من ليس له مهنة يروح يدور على مهنة وتبقى مهنته الارهاب ويطلع عقده الجنسية واللي فيها عنف علينا، وهو دا اللي احنا بنفهمهلكم”.

إلهام شاهين: الاسلام دين سماحة وأخلاق وكل ما يقال إنه خطأ في المسلسل مقصودة لتبريء الاسلام من داعش

وتابعت كاشفة هدف العمل، فقالت: “بطلوع الروح بيرصد  حد مش مقتنع زي شخصية أكرم، معموله غسيل مخ، وفي أوقات بيفوق لأن دي مش حقيقته وبيكتشف إن اللي هو فيه مش حقيقي وفي اللي زي عمر دا واحد بيتحرش بمرات صاحبه، فكل ده مقصود”.

وتابع:  “وأم جهاد اللي كل تصرفتها فيها عنف، اللي بتتوضى وقبل ما تصلي تضحك عليه بكلمتين هي مش صادقة في مشاعرها، وحوار إنها قالتله بكلمك حتى لا أتشتت في الصلاة دي مش أخطاء كل ده مقصود في الكتابة بالعكس بنفهمك ان ده كله ليس له علاقة بالاسلام، الاسلام دين سماحة وأخلاق مش ممكن يكون الاسلام له علاقة بالتحرش والقتل”.

إلهام شاهين: داعش مرتزقين ومأجورين

وأوضحت إلهام شاهين حقيقة الدواعش فقالت: “كلمة مجاهد لا تنطبق على الدواعش، المجاهد بيدافع عن بلده وأرضه وعرضه، لكن دول مالهم دي لا بلدهم ولا تخصهم ولا بيغتصب الأعداء، بيتصرفوا في سوريا على انها بلدهم لمجرد انهم بياخدوا فلوس مرتزقة ومأجورين”.

وأضافت: “المشهد اللي بيني وبين الشيخ نصار في الحلقة الخامسة بقوله فيها التحويل وصل من أمريكا، فقالي هما بعتوه بس هيتأخر شوية في حدود تركيا كل ده مقصود، مفيش حد صاحب قضية ياخد تمن اللي بيعمله”.

إلهام شاهين: الدواعش كل خطوة بيخطوها حرام والاسلام بريء منهم

واختتم إلهام شاهين حديثها لـ تحيا مصر، قائلة: “الدواعش سواء راجل أو ست الاتنين بيفكروا في الجنس والمصلحة الشخصية والدين برئ منهم ومثال على ذلك مكنش عمر " احمد السعدني " يجيب صاحبه من اخر الدنيا عشان يتحرش بمراته أو ام جهاد اللي قطعت الصلاه عشان تفكيرها في الشيخ نصار بعد م مات راحت اتجوزت عيل صغير ولسه معداش ايام على وفاة جوزها ، كل همها أنها تتجوز وتعيش حياتها، الدواعش كل خطوه بيخطوها حرام ومينفعش منحسبش القتل والاغتصاب والحرق والتحرش والذبح ونمسك في الخمرة ونقول أنها حرام ونسيب الباقي”.