"مش لاقية حد اتجوزه.. ومبتعاكسش".. تصريحات جريئة لـ شيرين رضا في برنامج حبر سري

صرحت الفنانة شيرين رضا العديد من التصريحات النارية خلال الحلقة الرابعة من برنامج حبر سري المذاع عبر شاشة قناة القاهرة والناس في تمام الساعة 6.20 مع الإعلامية أسما إبراهيم.

تحيا مصر يرصد لكم تصريحات الفنانة شيرين رضا المثيرة للجدل في برنامج حبر سري وذلك خلال السطور القادمة

أبرز تصريحات شيرين رضا في حبر سري

- الهجوم على فيلم الملحدمفتعل جدًا، وفيلم الملحد مبيتكلمش على الإلحاد

- معرفش مين مصطفى درويش ده مين بصراحة وماعتقدش ان دوره كان مهم في الفيلم عشان ينسحب ولا مبينسحبش 

- كل حاجة دلوقتي بتتشتم وكله ركوب تريند

- انا لو قريت الانتقادات دي مش هشتغل تاني ولا هتصور تاني ولا هنبسط تاني 

- كل واحد حر يعمل اللي هو عايزه احنا بنيجي الدنيا نعيش مرة واحده

- السوشيال ميديا طلعت آراء كانت زمان مكبوتة وكانت المفروض تفضل ساكتة

- مش المفروض ان نسمع اراء كل الناس عشان لو كده يبقى كل الناس تبقى رؤساء جمهورية

- أنا بسمع رأي الناس اللي حواليا وبطلب النصيحة 

- لما بلاقي كل الأراء معايا بعملها ولما يبقى كل الناس ضدي بردو هعملها

- مبحبش الكدب قولوا الحقيقة عشان مبتزعلش والكدب هو اللي بيزعل

- كل الكدب بيوجعني ومبسكتش حتى في الشغل عنيفة أنا وواضحة وصريحة

- اصدقائي الرجالة كانوا معايا في الفصل من المدرسة وهي دي الشلة اللي فضلتلي اعرفهم من وانا 4 او 5 سنين

- ومعظمهم ولاد عشان اللي سافرت واللي اتجوزت واللي راحت بعيد

- الستات فيهم نفسنة من بعض وانا مبحبهاش عشان لو هنحارب بعض ازاي هناخد خطوة لقدام

- معنديش وقت للحب والمناهدة ومواصفات رجل احلامي يكون بيضحكني

- وكريم محترم ومؤدب دي الحاجات الاساسية والزيادة اللي عليها يبقى دمه خفيف ومثقف ودكتور

- نفسي ابقى دكتورة

- انا مش هتجوز لا أحمد الفيشاوي ولا غيره عشان معنديش وقت وهو كان بيهزر

-  فشلت في جوازي مرتين واتعلمت من صغري اني لما افشل في حاجة مكررهاش تاني

- مفيش حد اتجوزه ومبتعاكسش بس اللي عايز يتجوزني يحارب

- لما بيجي مشهد مالك وتايسون نقول الفقرة الهندي ابتدت ومكناش بنفهمهم

- تايسون بيتحر اوي عشان ضخم ف مخارج الفاظه مش بتطلع صح وكله بسبب ظروف العمل اللي مينفعش نشغل فيها تكيفات عشان الصوت

-  احلام معنديش حاجة اقولهالها انا معرفهاش ومعرفش صوتها ولا سمعته

- انا ضد المنع ومضايقة ان بتوع المهرجانات اتمنعوا هما اه هبلوا بس مش من غلطة نبعدهم ازاي نمنعه

- ده بيحصل على طول زي الراب لما منعوهم في امريكا عشان مانوا بيشتموا فيه

- الفن الشعبي الاصيل من البلد بيبقى في قلة ادب

-  مفيش حاجة دخيلة علينا كان عندنا المايوهات والقبلات والاحضان من امتى بقينا كده احنا بنتقدم مش بنتأخر

- السينما لازم تبقى متنوعة 

- بابا مكنش عاوزني ابقى حاجة وعلمني وسألني انتي عايزة تكوني ايه ومضغطش عليا عشان اكمل مسيرته

- والفنون الشعبية مكنتش جوايا وجربت ورقصت مع الفرقة بس صعب أوي من حياتي كفنانة وممثلة

-  كنا صحاب أوي لما كنت 11 سنه كنا بنروح اسكندرية انا وهو بس وعمره ما عاملني على ان انا طفلة

- بابا كان بيخليني اعتمد على نفسي من وانا صغيرة عشان افلح في الحياة دي

- المفروض الاذان اكتر حاجة تقربني من ربنا ومعنديش مشكلة في الصوت العالي وانتقادي كان لازم يبقى المؤذن صوته حلو وانا مقولتش حاجة غلط.

- النبي مكنش بيأذن وبلال كان بيأذن عشان صوته احلى، مش عيب ومش لازم كلنا نعمل كل حاجة

- زي انا صوتي وحش وده مش صوت يغني مثلًا 

- وانا مش ضد الاذان او ضد ربنا انا ضد الصوت الوحش ليه منوحدش الاذان؟