فتاة ميت غمر تطالب النائب العام بالتدخل بعد براءة الـ 7 متحرشين

علقت بسنت فتاة ميت غمر، على قرار محكمة جنايات المنصورة الدائرة السابعة في محافظة الدقهلية، أمس الأحد، ببراءة المتهمين في قضية التحرش والمعروفة إعلاميًا بـ "فتاة ميت غمر"، والمتهم فيها 7 شباب.

تحيا مصر يرصد تعليق الضحية “فتاة ميت غمر” على قرار المحكمة، بعدما عاد هاشتاج “حق بسنت فين” يتصدر مواقع التواصل الاجتماعي المختلفة خلال الساعات القليلة الماضية.

تعليق فتاة ميت غمر على براءة المتحرشين

كتبت فتاة ميت غمر، عبر حسابها الرسمي على موقع التواصل الاجتماعي “فيس بوك”، قائلة: “طول الوقت اللي فات فضلت عدم الظهور وانتظار نتائج المسار القانوني لقضيتي هتك عرض وتحرش جنسي جماعي من قبل 7 أشخاص بمدينة ميت غمر على أمل إن حقي يرجع في واقعة تم تسجيلها على كاميرات المراقبة في المنطقة، والنتيجة أخدوا براءة!”.

وتابعت: “4 شهور وأنا منتظرة حقي يرجعلي، خلالهم تم تهديدي اكتر من مرة بالقتل والتشويه والاغتصاب، تم التشهير بيا وبحياتي واستخدام صوري الشخصية اللي كانت موجودة على حساب شخصي وبرايفت، تم الضغط عليا ومحاولات لمساومتي أكتر من مرة على فلوس علشان أتنازل عن القضية، تم ابتزازي من خلال محاولة تحرير محامي المتهمين قضية كيدية ضدي، تم نبذي من المكان اللي عشت فيه طول عمري وكنت ولازلت خايفة أروح بيت أهلي”.

وأضافت: “4 شهور وأنا مش حاسة غير بمشاعر رعب وقلق وظلم وإهانة، مش عارفة أفكر في حاجة غير الحادثة، حتى وأنا نايمة بحلم بالحادثة، حياتي واقفة تماماً، مش عارفة أفكر، مش عارفة أنام، بخاف وأنا خارجة الشارع، بخاف وأنا قاعدة في بيتي ومش حاسة إن في أي مكان في الدنيا ممكن يبقى آمن عليا مرة تانية، مش عارفة أتعامل مع آلامي النفسية واللي نتج عنها آلام جسدية”.

قضية فتاة ميت غمر

واستطردت الضحية حديثها، قائلة: “رغم كل محاولات الضغط عليا للتنازل رفضت وقررت اكمل في القضية، قررت أتجاهل كل الأصوات وأستجيب لنداء النيابة العامة بإن الست اللي تتعرض لانتهاك تروح تبلغ وحقها هيرجعلها، طب أنا أهو بلغت واستحملت كل تبعات قراري ودفعت تمن بلاغي تشهير وتهديد ووصم وإهانة، واللي كان مصبرني على ده إن في الاخر القانون ينصفني ويرجع لي حقي ويرد لي ولو جزء من كرامتي اللي اتهانت وعرضي اللي انتهك، وبعد كل ده في تاني جلسة لمحاكمة اللي انتهكوني أخدوا براءة وحاليا محامي المتهمين بيهدد بمقاضاتي..فأنا عايزة مسؤول يرد عليا ويفهمني دي رسالة معناها ايه! لما تدوني الأمان اجي أبلغ وأتحمل لوحدي تبعات كل ده وأدفع تمنه من روحي وأماني وفي الآخر المتهمين اللي متصورين وهما بيعتدوا عليا ياخدوا براءة! فايه الرسالة اللي عايزين توصلوها للستات اللي بيتم انتهاكها؟ وايه الرسالة اللي عايزين توصلوها لكل مجرم متحرش/ معتدي/ مغتصب”.

اقرأ أيضًا..أستاذ جامعي يبتز طالبته للتحرش بها مقابل الدرجات كاملة

واستكملت: “أنا مش حاسة دلوقتي غير بالقهر والغضب، وخايفة مشاعري تتحول لندم، خايفة أندم إني اتكلمت، إني طلبت حقي، إني صدقت إن في أمل، خايفة أندم إني كملت في القضية واعتبرت تنازلي عن حقي هو تنازل عن حق كل ست تم انتهاكها زيي لأني كنت دايماً بقول إني مش هتنازل ومش هسمح للمجرمين دول يمشوا ينتهكوا ستات تانية، كنت بقول اني مش هتنازل علشان لما حقي يرجعلي أكون بدي أمل لستات تانية تبلغ زيي وماتسكتش عن حقها، بس دلوقتي حقي راح، حقي وحق كل ست هتتأذي في المستقبل من الرجالة اللي أذوني أو رجالة غيرهم شافوا إن عادي ممكن ننتهك عرض واحدة ست في الشارع والكاميرات تصورنا وبردو نطلع براءة!”.

اقرأ أيضًا..رجل يستدرج طفلًا لسلم إحدى العمارات للتحرش به

واختتمت حديثها، قائلة: “أنا دلوقتي ظهرت وبكتب علشان مبقاش عندي حلول تانية، وعلشان يتم الطعن على الحكم لازم النائب العام هو اللي يطعن، فأنا دلوقتي بطالب النائب العام بالتدخل والطعن على الحكم اللي ضيع حقي وده أبسط حقوقي كست وكمواطنة تم انتهاكها في الشارع في حادثة الكاميرات صورتها، بطالب كل مسؤول عنده القدرة على مساعدتي يتدخل ويساعدني، بطالب أي حد يقدر يوصل صوتي يعمل ده، وأي حد يقدر يشارك البوست ده ويدون على هاشتاج #حق_بسنت_فين يعمل كده ويساعدني”.