نائبة"ضرب النار": دى خطوبة بنتى ومن حقى افرح

كشفت النائبة نوسيلة إسماعيل، عضو مجلس النواب، عن تفاصيل مقطع الفيديو الذى تردد على مواقع التواصل الاجتماعى لها وهى تطلق النار من شرفة منزلها، عبر مداخلة هاتفية لها مع الاعلامى أحمد موسى، على فضائية صدى البلد، قائلة: هي بقت حكاية خلاص؟..الواقعة عادية للغاية، متسائلة بانفعال شديد: "لو فيه فيديو لراجل بيضرب نار هل هتعمل ضجة كده ولا عشان أنا واحدة ست وعندي حصانة".

فرد الإعلامي أحمد موسى عليها قائلا: " عشان إنتي نائبة في البرلمان وتعتبري قدوه للمواطنين"، فكان ردها :" لية نظرة الناس للنائب أو النائبة أنه مش إنسان ومواطن عادي"، وتابعت: "أنا مواطنة مصرية وأنا كسيدة من حقي أرخص سلاح، وإذا كان ده غير قانوني مكنش يطلع لي رخصة زي أي راجل، كل الرجالة بتضرب نار في الشوارع والأفراح، لية الشو الإعلامي والضجة اللي زائدة عن اللزوم، ده عشان أنا سيدة؟ مش من حقي إني أفرح، ولا عشان أنا نائبة؟".

واضافت نوسيلة:"أنا سعيدة جدًا إني ضربت نار، دي خطوبة بنتي، ياريت الناس اللي بتهاجم تحط نفسها مكاني"، موضحة أنها رخصت هذا السلاح من أجل الدفاع عن النفس، كما أن لديها أيضًا طبنجة مرخصة تضعها تحت كرسي سيارتها باستمرار.

وتابعت: "أنا في البلكونة وفي الدور الـ 11 ومني لله، أي مني للسما، أنا مش همسك البندقية بالطريقة دي إلا إذا كنت متمكنة من ضرب النار، أنا مدربة على السلاح، في مركز تدريب وناس أصدقائي استكملوا تدريبي، إحنا داخلين على الانتخابات وفيه منافسين، وطبعا فيه إخوان، وينتهزوا خطأ أي نائب عشان يعملوا منها شو إعلامي".