«الرئيس السيسي»: عمري ما جاملت مخلوق ومحدش يجامل حد باسمي

قال الرئيس عبدالفتاح السيسي، خلال حفل تخرج الدفعة الأولى لكلية الطب العسكرى اليوم الخميس، إن فكرة إنشاء كلية طب للقوات المسلحة جائته لنأخذ بيدي العلم، مؤكدا متابعته بشكل يومى لكلية الطب العسكرى منذ نشأتها قبل 6 سنوات، مشيرا إلى أهمية تطبيق الاختبارات المميكنة على كل الجامعات للحد من التدخل البشرى.

وقال السيد الرئيس خلال كلمته: "النهاردة يوم جميل لأن ده عبارة عن فكرة فكرنا فيها وحلم موجود فى القوات المسلحة من فترة طويلة، ولما أنا اتوليت الوزارة فى الوقت ده كانت جاتلى الفرصة إن إحنا نطلق الفكرة ويكون فيه كلية طب عسكرى، وقلنا عاوزين ناخد بإيدين العلم والمعرفة الطبية من خلال الكلية دى".

وأضاف الرئيس السيسي: "أى حلم إن إحنا ممكن نحلم بيه بنستكتتره على نفسنا، بنتكلم عن موضوع بقاله 6 سنين، وبعد 6 سنين بنشوف أول ضوء منه، أوعوا تفتكروا إن الحلم خلال 6 سنين كانت اتسابت الكلية كده .. لا .. الكلية دى كانت بتتابع منى بشكل مستمر يوم بعد يوم .. احنا كمصريين فى كل إجراء بنعمله كل مسؤول يتابعه لغاية لما يخلص وحتى بعد ما يخلص، إذا كنتم عاوزين تنجحوا وتسبقوا الدنيا وتبقوا دولة ذات شأن أوعوا تفتكروا إن الثمن بتاعها كلام، الثمن مش كلام، والثمن عمل، عاوز أقولكم إن الاختبارات اللى اتعملت للطلبة لما بدأنا نتكلم عن الموضوع ده، قلت الكلية تختبر بالكامل، وقلنا نجيب اختبارات من الخارج، وفى كليات الطب الأخرى الاختبار اختيارى، وجبنا اختبارات من أعرق كليات الطب فى العالم، لكن لما اتكلمنا عن الطب العسكرى مقدرش ألزمها بحاجة أخرى غير الموجودة فى المنظومة.


وتابع خلال كلمته، "لو انت النهاردة اختبرت كويس من الابتدائى لغاية الجامعة مظبوط المنتج اللى هطلعه هطلع ابن أو بنت تمام، لو جاملت هطلعه ميعرفش غير المجاملة طريق للنجاح.. عاوز أقول للمصريين من فضلكم اتكلمت قبل كده محدش يجامل حد على الأقل باسمى يقولك أنا قريبه كذا وكذا من فضلكم والله والله والله بحلف تلاتة بالله العظيم أنا عمرى ماجاملت أثناء خدمتى فى الجيش مخلوق.. فانتوا كمان يا مصريين متجملوش حد من أول أنا".

جاء ذلك خلال حضور الرئيس عبد الفتاح السيسي حفل تخرج الدفعة الأولى لكلية الطب العسكرى دفعة المشير محمد عبد الغني الجسمي.