عاطف عبدالجواد يتقدم بطلب احاطة يكشف كوارث الصحة في مصر

تقدم النائب عاطف عبدالجواد، بطلب احاطة للدكتور علي عبدالعال رئيس مجلس النواب، موجه للدكتور احمد عماد وزير الصحة، بسبب تدهور حال المنظومة الصحية في مصر.

ولاول مرة في تاريخ طلبات الاحاطة، يقوم نائب بنقل رسالة طبيب وتحويلها لطلب احاطة يناقش تحت القبة، وجاء في طلب الاحاطة:

طبقا للائحة المجلس الموقر اتقدم بطلب إحاطه موجه الي الدكتور أحمد عماد وزير الصحة وهو تعبير عن طلب شعب بنى سويف، الذى إختارنى لأمثله وهى رساله ايضا من طبيب في وزارة الصحه طلب منى توصيله لللوزير، حيث يطلب رفع سعر تذكرة الكشف يالمستشفيات الحكومية ، لو ان حللة الاقتصاد تستدعى ذلك وسيكون المقابل تقديم خدمة مميزة.
وتسائل الطبيب في رسالته «ليه يا سيادة الوزير مخلي التذكرة بجنيه واحد حتى الأن ألا تعلم حضرتك ان المريض يدفع جنيه واحد ثمنا للتذكره ولما نكتبله علي حقنه بيطلع يشتري السرنجه بجنيه ونص هذا لو وجد الحقنه موجوده فى المستشفي أصلا.
ليه بنضحك علي الغلابة ونخلي التذكرة جنيه واحد ويفرح وهو راجع البيت بزجاجة دواء ( ان صح التعبير انه دواء فعلاً) ولكن الحق يقال شوية مية ملونه متعبيين فى زجاجه ومكتوب عليها ( خاص بوزارة الصحة) والا شويه برشام وكبسولات برضه عديمة الفاعليه.
لا احترام للبشر ولا كشف كويس ولا علاج كويس ( كله ده فى سبيل ان التذكره تبقى بجنيه واحد)
لو أضطرنا الحال لرفع قيمة التذكرة من جنيه واحد إلى خمسة جنيهات ماذا سبحدث لو ان هذه الخمسة جنيات دي لم تدخل جيب المسئولين ننتظر أن نرى مايلى:

١_ هيقل عدد الكشوفات للناس اللي جاية تاخد علاج ببلاش ( تحت بند أبو بلاش كتر منه) واللي شغال ف الصحة عارف معني كلامي كويس

٢_ هترفع مرتبات الأطباء والتمريض وموظفي الصحة فلما أخد مرتب محترم هعرف أدي الشغل حقة وحضرتك أكيد عارف معني كلامي كويس
( الدكتور هيكشف بضمير والممرضة هتعامل المرضي كويس) بدل ما احنا شغالين لله والوطن وياريت عاجب والا نافع

٣_ هتتعاقد مع شركات أدوية محترمه تصنع أدوية بمعايير دولية( يكون فعال وبيجيب نتيجة) ومش هيحتاج المريض يشتري أدوية كتير من بره المستشفي

٤_ المريض هيلاقي اهتمام ومعاملة أدمية سواء في انتظار دور الكشف أو اثناء الكشف أو في صرف العلاج
٥_ هتوفر الأجهزة والمستلزمات الطبية المطلوبة فى المستشفي وهتصلح الاعطال الموجوده فى الاجهزة القديمة وتشتري أجهزة حديثة تساعد فى التشخيص والتحاليل والعمليات
٦_ هتدرب العاملين بوزارة الصحة دكاترة تمريض موظفين عمال هتدربهم عشان يقدموا الخدمة الطبيه علي أكمل وجة

٧_ هتقلل عدد الدكاترة اللي عمالين يطفشوا يوميا. للدول العربية والأجنبية يدوروا علي عيشة محترمه ومرتب محترم

٨_ هتسفر حضرتك دكاترة يتعلموا بالخارج ويرجعوا يطبقوا اللي اتعلموه بدل ما المريض هو اللي يسافر

٩_ هترمم الاماكن القديمة فى المستشفيات او تهدها وتبني جديد

١٠ _ هتوصل معظم المستشفيات لحالة من الإكتفاء الذاتي ومش هتحتاج تحول العيان وتبهدله لان المستشفي هيبقي فيها كل الامكانيات
ممكن أكتب ١٠٠ نقطة بس كفاية كده وكل هذا بالخمسة جنيهات
هذه الرساله من طبيب بمستشفى قريتى أردت أن أبلغها لمعالى الوزير فى صورة طلب أحاطه طبقا لما كفله لى الدستور ولائحة مجلس النواب وليس المقصود من طلب الإحاطه هو زيادة سعر التذكرة من واحد جنيه لخمسة جنيهات لكن المقصود هو تصحيح مسار العلاج فى المسنشفيات والوحدات الصحيه بالمدن عامه والقرى بصفه خاصة حتى لو تطلب ذلك زيادة سعر التذكره لكن بعد تصحيح الأوضاع المترديه التى ذكرتها فى طلب الإحاطة.